"ქრისტიან-დემოკრატები" საკონსტიტუციო სასამართლოს მიერ მანიფესტაციების შესახებ კანონის ზოგიერთი ნორმის არაკონსტიტუციურად ცნობას მიესალმებიან. ამის შესახებ პარტიის ლიდერმა გიორგი თარგამაძემ განაცხადა. მისი თქმით, 2009 წლის საპროტესტო აქციებით გამოწვეული შეშფოთების პასუხად ნაციონალურმა მოძრაობამ მიიღო შეკრებებისა და მანიფესტაციების დისკრიმინაციული წესები.
"ჩვენ მაშინ უმწვავესად გავაკრიტიკეთ პარლამენტში შემოტანილი ცვლილებების პაკეტი და კენჭისყრისას პროტესტის ნიშნად დავტოვეთ დარბაზი. უფრო მეტიც, რადგან საკანონმდებლო ორგანოში "ქრისტიან-დემოკრატების" პოზიცია არ გაიზიარეს, მივმართეთ პრეზიდენტს ვეტოს უფლების გამოყენების მოთხოვნით. როგორც სჩვევია, ოპოზიციური სპექტრის და არასამთავრობო ორგანიზაციების აზრის სრული იგნორირებით, ხელისუფლებამ თავისი გაიტანა. საბედნიეროდ, საქართველოში მოიძებნა ინსტანცია, რომელმაც ძალადაკარგულად და ანტიკონსტიტუციურად ცნო ის ნორმები, რასაც ჩვენ მთელი ამ ხნის განმავლობაში ვაპროტესტებდით" - განაცხადა თარგამაძემ.
"ქრისტიან-დემოკრატების" ლიდერი წინგადადგმულ ნაბიჯს და სასიამოვნო მოულოდნელობას უწოდებს საკონსტიტუციო სასამართლოს გადაწყვეტილებას. მის თქმით, ეს პრეცედენტი, როცა პოლიტიკურ საკითხზე მიღებულია სამართლიანი გადაწყვეტილება, საკონსტიტუციო სასამართლოს მიმართ ნდობას გააჩენს არა მარტო საქართველოს ოპოზიციურ პარტიებში, არამედ აამაღლებს მის ავტორიტეტს საერთაშორისო ორგანიზაციების თვალში.
გიორგი თარგამაძის განცხადებით, სახალხო დამცველის, აშშ-ს სახელმწიფო დეპარტამენტის. ევროპის საბჭოს საპარლამენტო ასამბლეის ანგარიშების და არასამთავრობო ორგანიზაციების დასკვნების კონტექსტში საკონსტიტუციო სასამართლოს გადაწყვეტილება კიდევ უფრო მნიშვნელოვანი და რეზონანსული ხდება.