საქართველოს ცენტრალური საარჩევნო კომისიის ინფორმაციით, საარჩევნო გარემოს გაუმჯობესებაზე აქტიური მუშაობა მიმდინარეობს.
როგორც ცესკოში დღეს გამართულ პრესკონფერენციაზე აღინშნა, მიმდინარე წელს, გამოცდილების გაზიარებისა და საარჩევნო სისტემის დახვეწის მიზნით საქართველოს ცენტრალურმა საარჩევნო კომისიამ სხვადასხვა საერთაშორისო შეხვედრები განახორციელა.
კერძოდ, 2011 წლის თებერვალში საქართველოს ცენტრალურმა საარჩევნო კომისიამ აღმოსავლეთ ევროპის საარჩევნო ადმინისტრაციების წამომადგენლებს უმასპინძლა. ცესკოს მიერ დაგეგმილი შეხვედრის მთავარი მიზანი იყო აღმოსავლეთ ევროპის ქვეყნების საარჩევნო გამოცდილებების გაზიარება, რეგიონში ურთიერთთანამშრომლობის გაღრმავება, მჭიდრო და სისტემატური კავშირის დამყარება ადმინისტრაციებს შორის და მომავალი ერთობლივი პროექტების განხორციელება.
ამასთან, მიმდინარე წელს ცენტრალური საარჩევნო კომისიის წარმომადგენლები გამოცდილების გაზიარების და ურთიერთობების გაღრმავების მიზნით პოლონეთს, დიდ ბრიტანეთს, ლიტვას და ლატვიასაც სტუმრობდნენ. ცესკოს წარმომადგენლები ეუთო-ს დემოკრატიული ინსტიტუტებისა და ადამიანის უფლებათა ოფისის გრძელვადიანი და მოკლევადიანი სადამკვირვებლო მანდატებით მონაწილეობდნენ ბელორუსიისა 2010 წლისა და ყაზახეთის 2011 წლის 3 აპრილის არჩევნებში.
გარდა ამისა, ცესკოს წარმომადგენლები, საერთაშორისო სადამკვირვებლო მისიების გამოცდილების გაზიარების მიზნით, მონაწილეობდნენ ეუთოს დემოკრატიული ინსტიტუტებისა და ადამიანის უფლებათა ოფისის სადამკვირვებლო გრძელვადიან და მოკლევადიან მისიებში. ადმინისტრაციის რამდენიმე წარმომადგენელი OSCE/ODIHR-ის მანდატით აკვირდებოდა ბელორუსიის საპრეზიდენტო არჩევნებს 2010 წლის დეკემბერში და 2011 წლის საპრეზიდენტო არჩევნებს ყაზახეთის რესპუბლიკაში. საარჩევნო ადმინისტრაცია მომავალშიც აპირებს OSCE/ODIHR-ის სადამკვირვებლო მისიებში მონაწილეობის მიღებას.
"ცენტრალური საარჩევნო კომისია საერთაშორისო საზოგადოებასთან საარჩევნო გამოცდილების გაზიარებას და ურთიერთობის გაღრმავებას მომავალშიც გეგმავს. აღნიშნული ურთიერთობები ხელს შეუწყობს საქართველოში საერთაშორისო საარჩევნო სტანდარტების დანერგვას და ზოგადად საარჩევნო გარემოს გაუმჯობესებას", - განაცხადა ცესკოს პრესსპიკერმა ჯული გიორგაძემ.
