"თავისუფალი დემოკრატების" წარმომადგენელი დავით ონოფრიშვილი ხელისუფლებას "უპასუხისმგებლო ეკონომიკური და საბიუჯეტო პოლიტიკის" წარმოებაში ადანაშაულებს.
როგორც ონოფრიშვილმა დღეს გამართულ პრესკონფერენციაზე განაცხადა, საგადასახადო შემოსავლების გაზრდა არა ეკონომიკის წინსვლით, არამედ ქვეყანაში არსებული მაღალი ინფლაციითაა გამოწვეული.
"ხვალ საქართველოს პარლამენტი აპირებს დაამტკიცოს მთავრობის მიერ შემოთავაზებული კანონპროექტი ბიუჯეტში შესატანი ცვლილებების თაობაზე. წარმოდგენილი კანონპროექტით გათვალისწინებულია საგადასახადო შემოსავლების გაზრდა 350 მილიონი ლარით. სინამდვილეში ეს არის არა ეკონომიკის წინსვლით გამოწვეული მატება, არამედ ქვეყანაში არსებული მაღალი ინფლაციის შედეგი, რაც გამოიხატება როგორც ადგილობრივ, ისე იმპორტულ საქონელზე ფასების მნიშვნელოვანი ზრდის გამო მიღებულ დამატებით შემოსავლებში.ინფლაციური გადასახადის ხარჯზე დამატებითი ღირებულების გადასახადიდან შემოსავლები მატულობს 201 მლნ ლარით და მოგების გადასახადიდან 98 მლნ ლარით", - განაცხადა ონოფრიშვილმა.
მისივე განმარტებით, ხელისუფლების არაერთი განცხადების მიუხედავად, მთავრობამ არ შეიმუშავა და მოსახლეობას ვერ წარუდგინა ინფლაციასთან ბრძოლის კონკრეტული გეგმა.
"პირიქით, მას ურჩევნია კიდეც, რომ მაღალი ინფლაციის პირობებში, საკუთარი მოსახლეობის კიდევ უფრო გაღატაკების ხარჯზე, მიიღოს დამატებითი საგადასახადო შემოსავლები. მთავრობა აპირებს, რომ შემოსავლების მატების ნაწილი მიმართოს პენსიებისა და სოციალური პროგრამების გაზრდაზე. სინამდვილეში, ამგვარი მატება მოსახლეობის ვერც კეთილდღეობის ამაღლებას უზრუნველყოფს და ვერც ინფლაციის შედეგად მიყენებულ ნეგატიური შედეგების დაფარავს", - აღნიშნა მან.
აღნიშნულის კონტექსტში ონოფრიშვილი აცხადებს, რომ საბიუჯეტო ცვლილებების შესახებ წარმოდგენილი კანონპროექტი არ შეესაბამება ქვეყნის მოსახლეობის ინტერესებს, რადგანაც ვერ ხერხდება არსებული მწვავე სოციალური პრობლემების თუნდაც ელემენტარულ დონეზე გადაჭრა და ინფლაციით გამოწვეული უარყოფითი შედეგების დაძლევა.
