საქართველოს ენერგეტიკისა და ბუნებრივი რესურსების სამინისტრო რუსული კომპანისთვის კიდევ ერთი ქართული ენერგეტიკული აქტივის გადაცემის შესახებ „ჯი-ეიჩ-ენის" მიერ გავრცელებულ ინფორმაციას ადასტურებს.
როგორც უწყების ხელმძღვანელმა ალექსანდრე ხეთაგურმა ცოტა ხნის წინ საგანგებოდ გამართულ პრესკონფერენციაზე განაცხადა, ჰიდროელექტროსადგურების, "ხრამჰესი 1"-ისა და "ხრამჰესი 2"-ის რუსული კომპანია "ინტერ რაო ეესი"-სთვის გადაცემა მართაც იგეგმება და მას „მომგებიან გადაწყვეტილებად" აფასებს.
"ახალი ხელშეკრულება, რომელიც პირველ აპრილს გაფორმდა, რუსული კომპანიისთვის იქნება ერთგვარი სტიმული, რომ ჰესები უფრო მეტი დატვირთვით ამუშაონ, იზრუნონ მათ რეაბილიტაციაზე, გამოიმუშაონ უფრო მეტი ენერგია და, შესაბამისად, ქვეყნის ბიუჯეტს უფრო მეტი სარგებელი მოუტანონ", - განაცხადა ხეთაგურმა.
მისივე განმარტებით, 2000 წელს გაფორმებული ხელშეკრულებით "ინტერ რაო ეეს"-ს ჰესების 2025 წლამდე მართვის უფლება ისედაც ჰქონდა, რაც ფაქტობრივად იგივეა, რაც ამ ხნის განმავლობაში ჰესების მათ საკუთრებაში არსებობა.
„ამ ეტაპზე ჩვენთვის უფრო მომგებიანია "ინტერ რაო ეესი" არა მმართველი, არამედ მფლობელი იყოს. ახალი ხელშეკრულებაც სწორედ ამიტომ გაფორმდა", - აღნიშნა ხეთაგურმა.
შეგახსენებთ, რომ საქართველოს მთავრობის მიერ რუსულ "ინტერ რაო ეესისთვის" კიდევ ერთი ენერგეტიკული აქტივის დათმობის შესახებ "ჯი-ეიჩ-ენი" ერთი კვირის წინ წერდა. 1-ელ აპრილს გაფორმებული მემორანდუმის თანახმად, რუსული კომპანია "ინტერ რაო" "ხრამჰესი 1"-სა და "ხრამჰესი 2"-ის საფასურად 2011 წლის ნოემბრამდე ქართულ მხარეს 104 მლნ აშშ დოლარს გადმოურიცხავს. გარდა ამისა, კომპანიასთან გაფორმდა ხელშეკრულება მდინარე ხრამზე სამი ახალი ჰიდროელექტროსადგურის მშენებლობის შესახებ, რომლებიც ჯამში 90-100 მეგავატ ენერგიას გამოიმუშავებს. ჰესების მშენებლობისთვის "ინტერ რაო" 193 მლნ აშშ დოლარის ინვესტიციას განახორციელებს. არსებული გეგმის მიხედვით, მშენებლობა 2015 წლის ბოლოსთვის დასრულდება.
იხილეთ ჩვენს მიერ 1-ელ აპრილს გამოქვეყნებული მასალა