უკრაინის დელეგაცია თბილისის საკრებულოს თავმჯდომარე ზაალ სამადაშვილსა და საკრებულოს კომისიების თავმჯდომარეებს ადგილობრივი თვითმმართველობის საკითხების შესწავლის მიზნით ესტუმრა. დელეგაციაში უკრაინის სხვადასხვა ქალაქის საბჭოების დეპუტატები და ბიზნესმენები იმყოფებოდნენ.
როგორც პრილუცკის ქალაქის საბჭოს დეპუტატმა და დელეგაციის ხელმძღვანელმა ნიკოლაი ბაბიიმ განაცხადა, უკრაინის დელეგაცია ქართული მხარის გამოცდილებას გაიზიარებს. კერძოდ, მათ აინტერესებთ საქართველოს ეკონომიკის განვითარების სტრატეგია და ტაქტიკა, ინვესტიციების მოძიების ფორმულა, გრანტები და ტურისტული ბიზნესი.
მათთვის საინტერესო საკითხებზე უკრაინელ სტუმრებს საკრებულოს კომისიების თავმჯდომარეებმა უპასუხეს. ქონების მართვისა და საფინანსო-საბიუჯეტო კომისიის თავმჯდომარე თამაზ შოშიაშვილი მათ ადგილობრივი ბიუჯეტის პრიორიტეტებზე ესაუბრა.
ეკონომიკური განვითარების, საინვესტივიო პოლიტიკისა და საერთაშორისო ურთიერთობის კომისიის თავმჯდომარემ კოკი იონათამიშვილმა სტუმრებს ინგლისურისა და კომპიუტერის შემსწავლელი უფასო კურსების შესახებ ინფორმაცია მიაწოდა. ასევე, მცირე ბიზნესის მხარდამჭერი პროგრამები გააცნო, მათ შორის "ძველი თბილისის ახალი სიცოცხლე". საუბარი შეეხო დედაქალაქში ტრამვაის განვითარებასა და სარკინიგზო მაგისტრალის ქალაქიდან გატანის თემებსაც.
სამადაშვილმა უკრაინელი კოლეგები ოქტომბერში თბილისობაზე დაპატიჟა.
შეგახსენებთ, უკრაინის დელეგაცია საქართველოს 5 აპრილს ეტუმრა. ვიზიტის ფარგლებში, ისინი უკვე იმყოფებოდნენ ბათუმში, სადაც სასტუმროების ბიზნესითა და ტურიზმით დაინტერესდნენ. საკრებულოში სტუმრობის შემდეგ კი ისინი შეხვედრებს თბილისის მერიაში გამართავენ.
უკრაინელი სტუმრები დედაქალაქს 8 აპრილს დატოვებენ.