ხვალ, 7 აპრილს, 12:00 საათზე, ორგანიზაცია "კონსტიტუციის 42-ე მუხლის" ოფისში პრესკონფერენცია გაიმართება.
პრესკონფერენციის მიზანია გამოავლინოს საქართველოს კანონმდებლობაში არსებული არაკონსტიტუციური ნორმები და სასამართლო და საკანონმდებლო ხელისუფლების მხრიდან მათი შენარჩუნებისთვის გამოყენებული სამართლებრივი მანიპულაციები.
ორგანიზაცია "კონსტიტუციის 42-ე მუხლი" აცხადებს, რომ საქართველოს საკონსტიტუციო სასამართლოს და პარლამენტის მიერ საკანონმდებლო მანიპულაციების მეშვეობით, არაკონსტიტუციური დებულებების შენარჩუნება ჩვეულ პრაქტიკას წარმოადგენს და ამ პროცესმა უკვე შემაშფოთებელი ხასიათი მიიღო.
"კონსტიტუციის 42-ე მუხლი" მიიჩნევს, რომ საკონსტიტუციო სასამართლოს აღნიშნული ქმედებით, პარლამენტის მიერ საკონსტიტუციო სასამართლოს გადაწყვეტილების აღუსრულებლობით და სხვადასხვა სახის საკანონმდებლო მანიპულაციებით უხეშად ირღვევა საქართველოს კონსტიტუციით დაცული ადამიანის უფლებები, სახელმწიფოს მიერ ნაკისრი საერთაშორისო ვალდებულებები და ხდება საკონსტიტუციო სასამართლოს დისკრედიტაცია.
პრესკონფერენციაზე წარმოდგენილი იქნება კონკრეტული ფაქტები და საქმეები, რომლებიც საქართველოს პარლამენტის და საკონსტიტუციო სასამართლოს მიერ მსგავსი მანიპულაციების გამოყენების ფაქტებს დაადასტურებს.
