საკრებულოს თავმჯდომარის მოადგილე, "თავისუფალი დემოკრატების" წევრი ზურაბ აბაშიძე პარკირების ახალ სისტემას გაუაზრებლად მიიჩნევს. ამის შესახებ მან დღეს საკრებულოში გამართულ ბრიფინგზე განაცხადა.
ამასთან, პარკირების ცალკეული საკითხის გამო აბაშიძე დედაქალაქის მესვეურებს გულგრილობასა და უგულისყურობაში ადანაშაულებს.
"თბილისის მთავრობის მიერ დამტკიცებული მოქმედი წესების მიხედვით, პარკირების გადასახადი წლის განმავლობაში, 50 ლარია, ხოლო თვეში_25 ლარს, ერთ კვირაში კი 4 ლარს შეადგენს. ეს მაშინ, როცა ქალაქის მერი გიგი უგულავა წინასაარჩევნოდ მოქალაქეებს ჰპირდებოდა, რომ პარკირების გადასახადი არ გაიზრდებოდა. თუმცა გადასახადი ყოველგვარი დასაბუთების გარეშე გაორმაგდა", - აცხადებს ზურაბ აბაშიძე.
მისი თქმით, ასევე, დაუსაბუთებელია დაჯარიმების ოდენობაც. კერძოდ, ევაკუაციის საფასური 60 ლარს შეადგენს, 24 საათიანი სადგომზე მანქანის შენახვის საფასური 10 ლარია, ხოლო 30 დღეში ჯარიმის გადაუხდელობის შემთხვევაში, საურავი 150 ლარია.
აბაშიძის თქმით, დაუშვებელია, რომ 60 დღის განმავლობაში ჯარიმისა და საურავის მაქსიმალურმა ოდენობამ 830 ლარი შეადგინოს, რადგან ამ წესით, პარკირების კერძო კომპანიას მრავალათასიანი მანქანის გაყიდვა შეეძლება.
ზურაბ აბაშიძე მერიას პარკირების საფასურის სისტემის სრლყოფას ურჩევს. იგი ითხოვს,შემოიღონ პარკირების ერთდღიანი და ერთთვიანი საფასურის გადახდის სისტემა, რითაც დედაქალაქში საქართველოს რეგიონებიდან ჩამოსული სტუმრები და სატრანზიტო მანქანების მძღოლები ისარგებლებენ.
"ამ საფასურის გადახდა ტექნიკურად სწრაფი გადახდის აპარატითაც შეიძლება, რითაც დედაქალაქის სტუმრებს, სატრანზიტო მანქანების მძღოლებსა და თანამოაქალაქეებს სირთულე არ შეექმნებათ", - აცხადებს ზურაბ აბაშიძე.