"ქრისტიან-დემოკრატები" მოითხოვენ, სოციალურად დაუცველი ოჯახებისთვის, რომელთა სიღარიბის მაჩვენებელი 70 ათასიდან 100 ათას ქულამდეა, მშობიარობის ხარჯები სახელმწიფომ აუნაზღაუროს.
ამის შესახებ დღეს, "ქრისტიან-დემოკრატების" წევრმა მაგადა ანიკაშვილმა დღეს გამართულ ბრიფინგზე განაცხადა.
"მიუხედავად იმისა, რომ ჯანდაცვის სამინისტროს ინიციატივა, ორსულობის მეთვალყურეობის ვაუჩერის გაცემის თაობაზე მნიშვნელოვანი სიახლეა მოსახლეობის ინფორმირებულობის თვალსაზრისით, თავად დედათა და ბავშვთა ჯანმრთელობის პროგრამას არ დამატებია არც ერთი ახალი კომპონენტი", - აღნიშნა ანიკაშვილმა.
მისივე შეფასებით, არსებული სერვისები არ იძლევა ორსულობის სრულფასოვანი მეთვალყურეობის, საფრთხეების გამოვლენისა და დროული რეაგირების საშუალებას.
"აუცილებელია ვიზიტების რაოდენობის გაზრდა. მინიმუმ ექვსი კონსულტაციაა საჭირო, ნაცვლად ოთხისა, რათა მეან-გინეკოლოგმა შეძლოს ყველა შესაძლო გართულების თავიდან აცილება. პირველი ვიზიტის გამოკვლევებს უნდა დაემატოს C ჰეპატიტის დიაგნოსტიკა და გლუკოზის განსაზღვრა სისხლში. ყოველი მომდევნო ვიზიტი უნდა მოიცავდეს სისხლის და შარდის საერთო ანალიზებს და არა მხოლოდ ცილის და ჰემოგლობინის განსაზღვრას. ასევე უნდა გაიზარდოს ექოსკოპიური კვლევის რაოდენობა ოთხამდე", - აცხადებს ოპოზიციონერი დეპუტატი.
ანიკაშვილის თქმით, ამ დრომდე რეგიონებში მთავარ პრობლემად მშობიარობის დაფინანსება რჩება.
მისი ინფორმაციით, თბილისში ორსულს, რომლის ოჯახიც შეფასებულია სიღარიბის მაჩვენებლით 70 ათასიდან 100 ათას ქულამდე დედაქალაქის მთავრობა აფინანსებს.
"მშობიარობის ხარჯები სახელმწიფომ უნდა აანაზღაუროს, ამისთვის სულ 3-4 მილიონის გამოყოფაც საკმარისი იქნება", - აღნიშნა ანიკაშვილმა და აქვე დასძინა, რომ აღნიშნული თანხის გამოყოფა ჯანდაცვის სამინისტროს დეფიციტური პროგრამების ფონდიდანაც შეუძლია, რომლის ბიუჯეტიც 30 მილიონი ლარია.
