ჩინეთში ახალი, შიდსის მსგავსი ინფექცია აღმოაჩინეს - სამედიცინო დახმარებისათვის ჩინელ მედიკოსებს რამდენიმე ათასმა ადამიანმა მიმართა, რომელთაც შიდსის სიმპტომები აქვთ, თუმცა აივ-ინფექციაზე გაკეთებული ანალიზი უარყოფით შედეგს იძლევა. ამის გამო, ექსპერტები და მედიკოსები ვარაუდობენ, რომ ახალ, ადრე უცნობ ვირუსთან აქვთ საქმე. ინფორმაციას ამის შესახებ ადგილობრივი მედია ავრცელებს.
მათივე ინფორმაციით, აღნიშნული ვირუსი გამოვლენილია პეკინში, შანხაიში და ჩინეთის რამდენიმე პროვინციაში. ამას გარდა, ჰონკონგის პრესა იუწყება, რომ ეს უცნობი ვირუსი ჰონკონგსა და სინგაპურშია აღმოჩენილი. წინასწარი ინფორმაციით, ეს ინფექცია, როგორც შიდსი, ისეთივე გზებით გადადის - სექსუალური კონტაქტისას, სისხლითა და ნერწყვით.
პაციენტებს აღენიშნებათ ლიმფური კვანძების გადიდება, კიდურების ოფლიანობა, კანზე წითელი ლაქები და ტემპერატურის უმნიშვნელო მომატება. სწორედ ეს ნიშნები არის აივ-ინფექციით დაავადების პირველი სიმპტომები. ამის მიუხედავად, შიდსის ანალიზი უარყოფით შედეგს იძლევა, ამის გამო ადგილობრივმა მედიამ ამ ინფექციას უკვე შეარქვა "ნეგატიური აივ-ინფექცია".
ჩინური მედიის ინფორმაციით, აღნიშნული სიმპტომების დაავადებების მქონე პაციენტების მონაცემები, უკვე გადაგზავნილია აშშ-ს ლაბორატორიებში.
