ისრაელის უშიშროების სამსახურის ხელმძღვანელებმა პალესტინის მშვიდობიანი დარეგულირების ახალი გეგმა შეიმუშავეს.
გავრცელებული ინფორმაციით, ისინი იმედოვნებენ, რომ გეგმა გამოყენებული იქნება ქვეყნის მთავრობის მიერ პალესტინელებზე ზეწოლისთვის, რათა გაგრძელდეს ჩიხში შესული მოლაპარაკებები.
ისრაელის მთავრობის პრესსამსახურის ხელმძღვანელმა დაადასტურა გეგმის არსებობა და განაცხადა, რომ ის ეფუძვნება 2002 წლის „არაბულ ინიციატივებს".
„არაბული ინიციატივების" გამოყენებისგანა ისრაელი თავს იკავებდა იმის გამო, რომ მასში ფიგურირებს პუნქტი, 1967 წლის 6-დღიანი ომის დროს ისრაელის მიერ დაკავებულ ტერიტორიებზე პალესტინელი დევნილების დაბრუნების თაობაზე და აღნიშნულ მიწებზე ისრაელის მიერ უარის თქმაზე.
როგორც ისრაელის გამოცემები იუწყებიან, გეგმა შემუშავებულია ახლო აღმოსავლეთის ქვეყნებში მიმდინარე სახალხო ამბოხებების დრამატული მოვლენების გათვალისწინებით. პოლიტიკოსები და სამხედრო სპეციალისტები, რომლებმაც აღნიშნული გეგმა შეიმუშავეს, მოუწოდებენ ისრაელის ხელისუფლებას, დაუყოვნებლივ დაიწყოს მოლაპარაკებები პალესტინელებთან.
ჯგუფის ერთ-ერთმა წარმომადგენელმა განაცხადა, რომ გეგმა ითვალისწინებს ისრაელის მიერ პალესტინის სახელმწიფოს შექმნას შემდეგ ტერიტორიებზე - ღაზას სექტორი, სამარიისა და იუდეის ყველა რაიონი, მათ შორის აღმოსავლეთ იერუსალიმი.
გეგმაში ასევე შესულია პუნქტი პალესტინელი დევნილების შესაძლო ფინანსურ კომპენსაციაზე და იერუსალიმზე კონტროლის გაყოფაზე. კერძოდ, პალესტინური კვარტალების დიდი ნაწილის მათ კონტროლის ქვეშ გადაცემაზე, ხოლო ებრაული კვარტალების მართვას ისრაელი განახორციელებს.
