საპარლამენტო უმრავლესობა მთავრობას იმ პირების პრობლემის მოგვარებას სთხოვს, რომელებმაც საჯარო სამსახურში მიღებული ხელფასის პარალელურად, პენსიაც მიიღეს. ამის შესახებ განცხადება პარლამენტის პლენარულ სხდომაზე უმრავლესობის წევრმა გიორგი გოდაბრელიძემ გააკეთა.
მისი თქმით, მოსახლეობასთან შეხვედრებისას მცირე ნაწილმა გამოთქვა გულისტკივილი, საჯარო სამსახურში მომუშავე ადამიანებთან დაკავშირებით, რომლებიც პენსიებსაც იღებდნენ.
"დადგა დღის წესრიგში, რომ პენსია, რომელიც ხელფასთან ერთად ჰქონდათ აღებული, მართებულად არ იყო გაცემული და ახლა ამ თანხას პენსიონერებს უკან სთხოვენ. მთავრობას ვთხოვ, რომ ეს საკითხი დღის წესრიგიდან მოიხსნას", - აღნიშნა გოდაბრელიძემ.
მისი თქმით, მსგავი შემთხვევა 2008 წელსაც იყო და მაშინ ეს პრობლემა მთავრობის დადგენილების ამოქმედებით გადაწყდა.
"შესაძლებელია წელსაც გაკეთდეს", - განაცხადა გოდაბრელიძემ და დასძინა, რომ მსგავსი პრობლემა მომავალში აღარ შეიქმნება, რადგან უკვე არსებობს საპენსიო ფონდის მონაცემთა ბაზა.
