ტელევიზიებში სარეკლამო ჭრის შეზღუდვების შემცირებასთან დაკავშირებით კანონპროექტი პარლამენტმა პირველი მოსმენით მიიღო. აღნიშნულთან დაკავშირებით ცვლილება შედის "მაუწყებლობის შესახებ" კანონში.
კანონპროექტის თანახმად, მაუწყებლებს საშუალება მიეცემათ, სარეკლამო ჭრა გააკეთონ ახალი ამბების, საზოგადოებრივ-პოლიტიკურ, წინასაარჩევნო პროგრამებში ან დოკუმენტურ ფილმებში, რომელთა ხანგრძლივობაც 15 წუთზე მეტია, მაშინ, როდესაც დღეს, მოქმედი რედაქციით, დადგენილია 30-წუთიანი შეზღუდვა.
45-წუთიანი შეზღუდვა მცირდება 30 წუთამდე, რაც გულისხმობს, რომ დღეს მოქმედი რედაქციით, იკრძალება იმ მხატვრული ფილმების, ტელეფილმების ან ფილმის სერიის შეწყვეტა, რომლის ხანგძლივობაც 45 წუთზე ნაკლებია.
წარმოდგენილი ცვლილებების თანახმად, პროგრამა, რომლის ხანგრძლივობაც 30 წუთზე მეტია, შესაძლებელია შეწყდეს რეკლამით ან ტელეშოპინგით არა უმეტეს 3-ჯერ, მოქმედი კანონმდებლობით პროგრამის რეკლამით ან ტელეშოპინგით შეწყვეტა 3-ჯერ მხოლოდ იმ შემთხვევაში შეიძება, თუ მისი ხანგრძლივობა 45 წუთზე მეტია.
საბავშვო ან რელიგიური გადაცემა რეკლამით ან ტელეშოპინგით 30 წუთში ერთხელ შეიძლება შეწყდეს მხოლოდ იმ პირობით, თუ გადაცემის ხანგრძლივობა 30 წუთზე მეტია.
კანონპროექტის თანახმად, ტელე- ან რადიოარხზე რეკლამის ან ტელეშოპინგის მოცულობა არ უნდა აღემატებოდეს მაუწყებლის საერთო ხანგრძლივობის 20%-ს, ხოლო დღეს მოქმედი კანონით რეკლამის ან ტელეშოპინგის მოცულობა დღე-ღამის განმავლობაში არ უნდა აღემატებოდეს მაუწყებლის საერთო ხანგრძლივობის 15%-ს.
