2012 წლის 1-ელ იანვრამდე პირებს, რომლებსაც 2006 წლის 1-ელ ივლისამდე სახელმწიფო (საბაჟო) კონტროლის გვერდის ავლით ან მისგან მალულად საქართველოს ეკონომიკურ ტერიტორიაზე შემოტანილი მექანიკური სატრანსპორტო საშუალება აქვს შეძენილი, მისი ლეგალიზება შეეძლებათ.
აღნიშნულთან დაკავშირებით პარლამენტმა პირველი მოსმენით მიიღო "სახელმწიფო (საბაჟო) კონტროლის გვერდის ავლით ან მისგან მალულად საქართველოს ეკონომიკურ ტერიტორიაზე შემოტანილი მექანიკური სატრანსპორტო საშუალებების რეგისტრაციის წესის შესახებ" კანონპროექტი.
როგორც საკანონმდებლო ინიციატივის ავტორმა, დეპუტატმა პავლე კუბლაშვილმა აღნიშნა, ანალოგიური კანონი პარლამენტმა 2008 წელსაც მიიღო, თუმცა იგი რამდენიმე თვეს მოქმედებდა.
"გვინდა ამ კანონის მიღებით საბაჟოს გვერდის ავლით შემოტანილი ტრანსპორტის კეთილსინდისიერად შეძენის შემთხვევაში მოხდეს მისი ლეგალიზება, რათა აღარ იყოს ეჭქვეშ საკუთრების უფლება. კანონი რამდენიმე თვეს იმოქმედებს და ამ პერიოდში მოსახლეობას საშუალება მიეცემა, ამ სახის ტრანსპორტის ლეგალიზება მოახდინოს", - აღნიშნა კუბლაშვილმა.
მისი განმარტებით, აღნიშული პრობლემები ჯერ კიდევ არის რეგინებში და შსს-ის სააგენტომ მოსახლეობას ეს პრობლემები ადგილზე უნდა მოუგვაროს.
კანონპროექტი იმ მექანიკური სატრანსპორტო საშუალების რეგისტრაციის წესსა და ძირითად პირობებს არეგულირებს, რომლებიც საქართველოს მოქალაქეებისა და საქართველოში რეგისტრირებული იურიდიული პირების მიერ კეთილსინდისიერადაა შეძენილი 2006 წლის 1-ელ ივლისამდე, აგრეთვე არეგულირებს ორგანოების უფლებამოსილებას, რომლებიც რეგისტრაციის განხორციელებისას წარმოადგენენ სახელმწიფოს.
კანონი არეგულირებს იმ პირთა პასუხისმგებლობიდან განთავისუფლების საკითხსაც, რომლებმაც 2007-2009 წლებში საქართველოს შინაგან საქმეთა სამინისტროს მომსახურების სააგენტოში მექანიკური სატრანსპორტო საშუალების პირველად რეგისტრაციამდე და პირველადი რეგისტრაციის თაობაზე ჩანაწერის განხორციელებისას არ უზრუნველყვეს მექანიკური სატრანსპორტო საშუალების საქართველოს ეკონომიკურ ტერიტორიაზე შემოტანის საფუძველზე კანონმდებლობით განსაზღვრული ვალდებულებების შესრულება.
კანონპროექტში განმარტებულია, რომ მექანიკურ სატრანსპორტო საშუალებებში შედის ყველა სახის სასოფლო-სამეურნეო ტექნიკა, მისაბმელები, ნომრიანი აგრეგატები და დამხმარე ტექნიკური საშუალებები.
მათი ლეგალიზების შემთხვევაში, პირმა წერილობით განცხადება შსს-ის მომსახურების სააგენტოში უნდა წარადგინოს და სააგენტომ განცხადება მიღებიდან 10 სამუშაო დღის ვადაში უნდა განიხილოს, თუმცა თუ რეგისტრაციის საკითხის გადასაწყვეტად არსებითი მნიშვნელობის მქონე გარემოებაა დასადგენი, სააგენტო უფლებამოსილია, ვადა გაზარდოს, თუმცა ის არ უნდა აღემატებოდეს ერთ თვეს.
თუ სააგენტო უარს იტყვის სატრანსპორტო საშუალებების რეგისტრაციაზე, დაინტერესებულ პირს 5 დღის ვადაში წერილობით უნდა აცნობოს, რომლის გასაჩივრებაც შესაძლებელია კანონმდებლობით დადგენილი წესით.
