CENN-მა ფონდ „პარტნიორობა საგზაო უსაფრთხოებისათვის" თანამშრომლობით დაიწყო ახალი ინიციატივის - ,,საავტომობილო საწვავის ეფექტიანობის პროგრამის ინიცირება საქართველოში და საწვავის ეკონომიის ინიციატივის (GFEI) განვითარება კავკასიაში" განხორციელება. პროექტი საწვავის ეკონომიის გლობალური ინიციატივის (GFEI) ნაწილია და წარმოადგენს პირველ ინიციატივას, რომელიც სამხრეთ კავკასიის რეგიონში საწვავის ეკონომიის საკითხებზეა მიმართული. პროექტის მხარდაჭერას "გაერთიანებული ერების ორგანიზაციის გარემოს დაცვის პროგრამა" (UNEP) და GFEI-ის პარტნიორი ორგანიზაციები: საერთაშორისო ენერგეტიკული სააგენტო (IEA), საერთაშორისო სატრანსპორტო ფორუმი (ITF) და ავტომობილისტთა საერთაშორისო ფედერაციის ფონდი (FIA Foundation) უზრუნველყოფენ.
პროექტის მიზანია, სამხრეთ კავკასიის ქვეყნებში, GFEI-ის ფარგლებში საწვავის ეკონომიის ეროვნული გეგმის, მიზნებისა და პოლიტიკის განვითარების დაჩქარება. არსებული პოლიტიკის, სტრატეგიებისა და ტექნოლოგიების გამოყენება ხელს შეუწყობს საავტომობილო საწვავის ეკონომიის და ენერგოუსაფრთხოების გაზრდას ეროვნულ დონეზე, ასევე ნახშირორჟანგისა და სხვა დამაბინძურებელების გამოყოფის შემცირებას საავტომობილო სექტორიდან და შესაბამისად წვლილს შეიტანს 2050 წლისათვის მთელს მსოფლიოში საწვავის ეკონომიის 50%-ით გაუმჯობესებაში.
პროექტი დაიწყო საქართველოში, თუმცა გათვალისწინებულია სამხრეთ კავკასიის ქვეყნების აქტიური ჩართვა დაგროვილი ცონდისა და გამოცდილების გაზიარების კუთხით. GFEI-ის მიზანია სატრასპორტო სექტორში საწვავის ეფექტიანობასთან დაკავშირებული წარმატებული და ფასის მხრივ ეფექტური მიდგომების გავრცელების ხელშეწყობა. მის ფარგლებში შექმნილია ამ კუთხით არსებული ექსპერტული გამოცდილების საერთაშორისო ქსელი, რათა ხელი შეეწყოს ისეთ ეროვნულ და რეგიონულ ინიციატივებს, როგორიცაა მაგალითად საწვავის ეკონომიის კავკასიის ინიციატივა (CFEI).
პროექტის განმახორციელებელი გუნდი ითანამშრომლებს ყველა დაინტერესებულ მხარესთან - სამთავრობო და არასამთავრობო სტრუქტურების, საერთაშორისო ორგანიზაციების, ბიზნეს-სექტორის და მომხმარებელთა ჯგუფების ჩათვლით, რათა მოხდეს მათი შეხედულებების და მოსაზრებების გათვალისწინება.
ინიციატივის ფარგლებში დაგეგმილი აქტივობები განხორციელდება ორი ძირითადი მიმართულებით:
1) საქართველოს ინტენსიური ჩართვა GFEI-ის ინიციატივაში, როგორც საფუძველი ამ ინიციატივის კავკასიის ფარგლებში განხორციელების დაწყებისა და ასევე GFEI-ის მიდგომების გამოყენებით შემდეგი საკითხების შესწავლა:
• ინსტიტუციონალური და ავტოპარკის მონაცემთა ბაზის შექმნა (ყოველწლიური ემისიების მაჩვენებლების ჩათვლით);
• მიზნების გამოკვეთა ეროვნულ დონეზე კონსულტაციების გამართვის გზით;
• ავტოსაწვავის ეფექტურობის გეგმის/პოლიტიკის შემუშავება
2. GFEI მიდგომის და საქართველოში მიღებული გამოცდილების გარცელება სამხრეთ კავკასიაში.
ინიციატივის შედეგად, რომელიც განხორციელდება 2 წლის განმავლობაში, შემუშავდება საწვავის ეკონომიის ეროვნული საპროექტო წინადადება საქართველოში, ჩატარდება პრაქტიკული ტრენინგი გადაწყვეტილების მიმღები პირებისათვის და მიღებული გამოცდილება გაზიარებული იქნება სამხრეთ კავკასიის ქვეყნებს შორის.
პროექტის ფინანსური მხარდაჭერა უზრუნველყოფილია "გაერთიანებული ერების ორგანიზაციის გარემოს დაცვის პროგრამის" (UNEP), გლობალური გარემოსდაცვითი ფონდის (GEF) და ევროკავშირის (EU) მიერ. ინიციატივა ეფუძნება თანამშრომლობა უფრო სუფთა საწვავისა და სატრანსპორტო საშუალებებისათვის (PCFV) მიერ UNEP-ის მხარდაჭერით სუფთა საწვავსა და ავტოტრანსპორტზე რეგიონში ჩატარებულ სამუშაოს.
