პოლიტოლოგი სოსო ცინცაძე ხელისუფლებისადმი ოპოზიციური "რვიანის" ახალ შეთავაზებას დათმობაზე წასვლად არ მიიჩნევს და აცხადებს, რომ უმცირესობამ მხოლოდ ბრძოლის ტაქტიკა შეცვალა.
"რვიანი" დათმობაზე არ წასულა, არც სტრატეგია შეუცვლია. შეცვალა მხოლოდ ტაქტიკა და მმართველ გუნდს შესთავაზა, რომ საარჩევნო გარემოს გაუმჯობესებასთან დაკავშირებულ საკითხებზე შეთანხმება ნაწილ-ნაწილ, ნაბიჯ-ნაბიჯ მოხდეს. ტაქტიკურად ეს გამართლებულია, თუმცა ოპოზიციური პარტიების წარმატების გარანტი, ბუნებრივია, არ არის. შეიძლება რომელიმე საკითხში, თუნდაც ბიომეტრიულ პასპორტებით ხმის მიცემასთან დაკავშირებით მოლაპარაკებები ისევ გაიჭედოს", - განუცხადა სოსო ცინცაძემ "ჯი-ეიჩ-ენს".
მისივე განმარტებით, ქვეყნის ინტერესებიდან გამომდინარე აღნიშნული მოლაპარაკებების ჩაშლა არ უნდა მოხდეს, რადგან ის მასში მონაწილე ორივე მხარეს წაგებულს დატოვებს.
"მოლაპარაკებების ჩაშლა ორივე მხარისთვის ერთნაირად წამგებიანია. ვერ ვიტყვით რომელი ძალისთვის უფრო - ორივე წააგებს და მოგებული დარჩება მხოლოდ ერთი მხარე - რადიკალური ოპოზიცია, რომელიც წლების განმავლობაში ამტკიცებს, რომ ერთადერთი გზა ხელისუფლებაში მოსვლისთვის არის შეიარაღებული აჯანყება და ბარიკადები. როგორც ჩანს ეს მოლაპარაკებებში მონაწილე ორივე პოლიტიკურ მხარეს ესმის", - აღნიშნა ცინცაძემ.
შეგახსენებთ, რომ ოპოზიციური "რვიანი" საარჩევნო გარემოს გაუმჯობესებისთვის ხელისუფლებას მის მიერ დაყენებულისაკითხების ეტაპობრივად განსახილვას სთავაზობს.
