კომპანიამ "დიდუბის მარკეტი" თბილისის ცენტრში, დიდუბეში ახალი სამაცივრე მეურნეობა გახსნა.
„დიდუბის მარკეტის" ხელმძღვანელის ვანო იოსელიანის განმარტებით, ამ დროისთვის მეურნეობა ეტაპობრივად იტვირთება.
"მიუხედავად იმისა, რომ სამაცივრე მეურნეობა ახლად გახსნილია, მისი 60% უკვე დატვირთულია. სამაცივრე მეურნეობაში ამ დროისთვის წარმოდგენილია 11 უმსხვილესი იმპორტიორი და ადგილობრივი მწარმოებელი კომპანია. ამ დროისთვის მიმდინარეობს მოლაპარაკებები სხვა კომპანიებთან და თვის ბოლოსთვის მეურნეობა სრულად იქნება დატვირთული," - განმარტავს იოსელიანი.
სამაცივრე მეურნეობა თანამედრივე სტანდარტებს აკმაყოფილებს, იგი აღჭურვილია ცნობილი იტალიური კომპანიის "ტექნო ბლოკი" დანადგარებით, შესაბამისად, სამაცივრე მეურნეობაში დაცულია ტემპერატურული, სანიტარული, ტენიანობისა და სხვა რეჟიმები, რაც სურსათის უვნებლობას უზრუნველყოფს.
მეურნეობა 1500 კვ. მეტრის ფართზეა განთავსებული, თუმცა სრულად დამხმარე ტერიტორია 7000 კვ. მეტრს მოიცავს. სამაცივრე მეურნეობა გათვლილია როგორც ხორც-პროდუქტებისა და თევზის, ასევე ხილ-ბოსტნეულის შესანახად და რეალიზაციისათვის.
"დიდუბის მარკეტი" კომპანიებსა და კერძო პირებს სავაჭრო ფართით სარგებლობის შესაძლებლობასაც აძლევს - ყოველ სამაცივრე საკანს საკუთარი სავაჭრო ფართი გააჩნია, რაც მცირე, საშუალო და მსხვილი კომპანიებისთვის დროისა და ფინანსების დაზოგვის შესაძლებლობას ქმნის.
მინიმალური ფართი მოიჯარისათვის 63 კვ. მეტრით განისაზღვრება. სამაცივრე მეურნეობის მომსახურების ტარიფები კი კონკურენტუნარიანია.
მენეჯმენტს სამაცივრე მეურნეობის მოწყობა 1 მლნ აშშ დოლარი დაუჯდა. მომავალში იგეგმება მისი გაფართოება, რაზეც „დიდუბის მარკეტი" დამატებით 1 მლნ აშშ დოლარის ინვესტიციას განახორციელებს.
„დიდუბის მარკეტი" „საქინვესტის" შვილობილი კომპანიაა, რომელიც თავის მხრივ ჰოლდინგის „საქართველოს ინდუსტრიული ჯგუფი" შემადგენლობაში შედის.