პრეზიდენტ სააკაშვილის შეფასებით, ისრაელის მოქალაქეების - რონი ფუქსისა და ზეევ ფრენკელის მიმართ გამოტანილი განაჩენი საქართველო-ისრაელის ურთიერთობაზე არ აისახება. ამის შესახებ დღეს გამართულ ბრიფინგზე პრეზიდენტის პრესსპიკერმა მანანა მანჯგალაძემ განაცხადა.
"გამოძიების არცერთ ეტაპზე არ ჩავრეულვართ. გადაწყვეტილება სასამართლომ მიიღო. კანონის წინაშე ყველა ვალდებულია, მიუხედავად მისი წარმომავლობისა. მიგვაჩნია, რომ ეს არ არის სახელმწიფოთაშორისო საკითხი", - განაცხადა მანჯგალაძემ.
პრესსპიკერი თქმით, პრეზიდენტს ნებისმიერი ადამიანის შეწყალების უფლება აქვს კონსტიტუციით და სხვა საკითხია შეიწყალებს თუ არა ამ ორ კონკრეტულ მოქალაქეს პრეზიდენტი.
შეგახსენებთ, რომ თბილისის საქალაქო სასამართლომ ისრაელის მოქალაქეებს, ბიზნესმენებს რონი ფუქსსა და ზეევ ფრენკელს პატიმრობა შეუფარდა. სასამართლოს მიერ რამდენიმე წუთის წინ გაცხადებული ოფიციალური გადაწყვეტილების საფუძველზე, ფუქსს პატიმრობის ვადად 7 წელი, ფრენკელს კი 6 წელი განესაზღვრათ. გარდა ამისა, როგორც "ჯი-ეიჩ-ენს" საქალაქო სასამართლოში განუცხადეს, ორივე მსჯავრდებულს ფულადი ჯარიმის გადახდაც მოუწევს - ფრენკელს 100 ათასი ლარის, ფუქსს კი 500 ათასი ლარის ოდენობით. ბიზნესმენები დამნაშავედ სისხლის სამართლის კოდექსის 339-ე მუხლის მე-3 ნაწილში გამოცხადდნენ, რაც სახელმწიფო მოხელისთვის ქრთამის მიცემას ითვალისწინებს. როგორც ცნობილია, შეგახსენებთ, რომ ბიზნესმენები რონი ფუქსი და ზეევ ფრენკელი ბათუმში, გასული წლის 14 ოქტომბერს დააკავეს. ბიზნესმენებს მაღალი თანამდებობის პირისთვის ქრთამის შეთავაზება ედებათ ბრალად. მათ აღმკვეთი ღონისძიების სახით პატიმრობა აქვს შეფარდებული. პატიმრობა შეეფარდა, აგრეთვე, იოანის კარდასოპოლუსს, რომელიც მიმალვაშია და მასზე ძებნაა გამოცხადებული.
