"ქართული დასის" ლიდერი, დეპუტატი ჯონდი ბაღათურია ხელისუფლებას პარლამენტისთვის მიცემული პირობების შესრულებას სთხოვს.
როგორც დღეს ბრიფინგზე ბაღათურიამ აღნიშნა, მთავრობა ითხოვს ნებართვას - ერთი მილიარდი დოლარის ოდენობის საგარეო ვალი აიღოს, კერძოდ 500 მილიონი დოლარი აზიის განვითარების ბანკიდან ურბანული მომსახურების გაუმჯობესების პროექტების დასაფინანსებლად და 500 მილიონი დოლარი საშინაო და საგარეო ფასიანი ქაღალდების (ევრობონდის) გამოშვებისთვის, მაშინ, როდესაც სოფლის მეურნეობის განვითარებისთვის მხოლოდ 9 მილიონი ლარია გათვალისწინებული.
"არ სრულდება პრეზიდენტისა და მთავრობის მიერ პარლამენტისთვის მიცემული პირობა სოფლის მეურნეობის განვითარებისთვის ბიუჯეტიდან 150 მილიონი ლარის გამოყოფის შესახებ. ეს თანხა სავსებით საკმარისი იქნება ამ დარგის განვითარებისთვის, რაც გამოიწვევდა დამატებით მაღალანაზღაურებადი სამუშაო ადგილების შექმნას", - აღნიშნა ბაღათურიამ.
დეპუტატმა მთავრობას მოუწოდა, შეასრულოს პარლამენტისთვის მიცემული პირობა სოფლის მეურნეობისთვის დამატებით 150 მილიონი ლარის გამოყოფის შესახებ.
