აფხაზმა არქეოლოგებმა სოხუმის ცენტრში, ტერიტორიაზე, რომელიც აფხაზეთში რუსეთის ე.წ. საელჩოს შენობის აშენებისთვისაა გამოყოფილი, ანტიკური ჭა აღმოაჩინეს, რომელიც IV-III სს. თარიღდება. ინფორმაციას ამის შესახებ აფხაზური მედია ავრცელებს.
აფხაზეთის ისტორიულ-კულტურული მემკვიდრეობის დაცვის ე.წ. სამმართველოს ხელმძღვანელი ვადიმ ბჟანია აცხადებს, რომ ანტიკური კულტურა აფხაზეთში ბერძნულ კოლონიზაციასთან ერთად აღწევს ძვ.წ. აღ. VI საუკუნეში.
"ჭის სიღრმე 5 მეტრია. ფსკერზე აღმოჩენილია შავი ლაკით დაფარული კერამიკის ნატეხები. არქეოლოგები ვარაუდობენ, რომ ეს საკმაოდ დიდი ჭა უძველესი დიოსკურიის მაცხოვრებლებს ცივი წყლით ამარაგებდა", _ აცხადებს ბჟანია და დასძენს, რომ ამ ფორმის ჭებზე აფხაზეთის ტერიტორიაზე კვლევა არ ჩატარებულა.
"რა თქმა უნდა ჩვენ გვინდა, რომ აღნიშნული ობიექტი შენარჩუნდეს და მისი ყველასათვის ჩვენება შეიძლებოდეს. ჩვენს დროში საკმაოდ ბევრი საშუალებაა მისი კონსერვაციისათვის. ჯერჯერობით კი არ ვიცით, როგორი იქნება ამ უნიკალური არქეოლოგიური ობიექტის მომავალი ბედი", _ აცხადებს ბჟანია.
