2011 წლის 1-ლი მარტის მდგომარეობით, საქართველოს საბანკო სექტორი 19 კომერციული ბანკითაა წარმოდგენილი; მათ შორის 14 - საწესდებო კაპიტალში უცხოური კაპიტალის მონაწილეობით და 2 - უცხოური ბანკის ფილიალით.

სებ-ის მონაცემებით, წლის დასაწყისთან შედარებით, საქართველოს კომერციული ბანკების მთლიანი აქტივები (მიმდინარე ფასებში) 111.3 მლნ ლარით, ანუ 1.1 პროცენტით გაიზარდა და 10675.5 მლნ ლარი შეადგინა. საბანკო სექტორის საკუთარი სახსრები 1718.7 მლნ ლარს შეადგენს, რაც კომერციული ბანკების მთლიანი აქტივების 16.1 პროცენტია.
უცხოური კაპიტალის მონაწილეობამ ბანკების მთლიან განაღდებულ საწესდებო კაპიტალში 81.0 პროცენტი შეადგინა.

2011 წლის იანვარ-თებერვალში მოქმედი ბანკების შემოსავლები 33.8 პროცენტით გაიზარდა წინა წლის შესაბამის პერიოდთან შედარებით და 289.7 მლნ ლარი შეადგინა. მიმდინარე წლის პირველ ორ თვეში კომერციული ბანკების წმინდა მოგების საერთო თანხამ 10.7 მლნ ლარი შეადგინა.

წელს საბანკო სექტორის აქტივების კონცენტრაციის დონე პრაქტიკულად არ შეცვლილა. ხუთი უმსხვილესი აქტივების მქონე ბანკის წილი საბანკო სექტორის მთლიან აქტივებში წლის დასაწყისიდან 0.3 პროცენტული პუნქტით შემცირდა და 77.8 პროცენტს მიაღწია.
საბანკო სექტორის აქტივების რენტაბელობა თებერვლის თვის შედეგებით 0.6 პროცენტს შეადგენს, ხოლო კაპიტალის რენტაბელობა 3.7 პროცენტია (ნაცვლად -0.1 და -0.7 პროცენტისა შესაბამისად, გასული წლის თებერვლისათვის).