დღეს ვაზიანში მყოფმა საქართველოს პრეზიდენტმა მიხეილ სააკაშვილმა, რომელიც შეიარაღებული ძალების პირველი საარტილერიო ბრიგადის ახალი დისლოკაციის ადგილის გახსნას დაესწრო, პირობა დადო, რომ საქართველოს მთავრობა გააგრძელებს მუშაობას იმისათვის, რომ ქართველი ჯარისკაცები უზრუნველყოფილნი იყვნენ კარგი შენობებით, კარგი ანაზღაურებით, კარგი აღჭურვილობით.
“სამაგიეროდ თქვენგან ჩვენ ვითხოვთ ყოველდღიურ მუშაობას თქვენს საბრძოლო მომზადებაზე, თქვენს ცოდნაზე, თქვენს უნარებზე, მათ შორის უცხო ენებზე, იმიტომ რომ მათ გარეშე არაფერი არ გამოდის, კომპიუტერებზე, იმიტომ რომ კომპიუტერის გარეშე თანამედროვე ტექნიკის და თანამედროვე ბრძოლის ათვისება არ ხდება. თანამედროვე ბრძოლის ველი ეს არის პირველ რიგში კომპიუტერის ცოდნა და არა უბრალოდ გამბედაობა” – განაცხადა სააკაშვილმა და იქვე აღნიშნა, რომ დღეს ყველაფერი, დაწყებული რაციიდან, დამთავრებული ელექტრონიკით და იმ აპარატურის მართვით რომელიც გამოიყენება თანამედროვე საბრძოლო ვითარებაში. ყველაფერი ეს დაფუძნებულია კომპიუტერისა და უცხო ენის ცოდნაზე.
“რა თქმა უნდა ამას ემატება პირველ რიგში ფიზიკური მომზადება და ზოგადი მომზადება თითოეული მებრძოლის. ჩვენ გვჭირდება მოაზროვნე და ბეჯითი ხალხი და ჩვენი ოფიცრების, სერჟანტების და ჯარისკაცების აბსულუტური უმეტესობა სწორედ ასეთია.
ქართველი ჯარისკაცი არის ერთ-ერთი ყველაზე გამბედავი და გმირული მთელს მსოფლიოში. სახელმწიფოს ვალდებულება არის, რომ უზრუნველყოს ის სათანადო მხარდაჭერით და სათანადო ხელმძღვანელობით იმისათვის, რომ ეს ყველა უნარი გამოვლინდეს უმაღლეს დონეზე და საქართველო გაძლიერდეს” – განაცხადა საქართველოს პრეზიდენტმა.
მასალის გამოყენების პირობები