რუსეთის უშიშროების საბჭოს მდივანმა სერგეი შოიგუმ განაცხადა, რომ სომხეთი და საქართველო დასავლეთის მხრიდან მათ პოლიტიკურ ვითარებაში ღია და უხეშ ჩარევას აწყდებიან.
„დასავლეთი ღიად და უხეშად ცდილობს პოლიტიკურ ვითარებაში ჩარევას. ამიერკავკასიაში ამის მაგალითები შეგვიძლია ვიხილოთ არა მხოლოდ სომხეთის, არამედ საქართველოს შემთხვევაშიც“, - განაცხადა მან.
რუსეთის უშიშროების საბჭოს მდივანი ასევე დარწმუნებულია „სახელმწიფოებს შორის გადაუჭრელი წინააღმდეგობები არ არსებობს“, ხოლო უთანხმოების წარმოშობის შემთხვევაში, პირველ რიგში, უნდა შეფასდეს, ვის აძლევს ხელს მეზობელი ხალხებისა და სახელმწიფოების დაპირისპირება.
„როგორც წესი, ამის უკან დასავლელები დგანან, რომლებიც დაინტერესებული არიან, შეინარჩუნონ კონტროლი ეკონომიკის მომგებიან სექტორებზე, სატრანსპორტო-ლოგისტიკურ დერეფნებსა და რესურსებზე“, - აღნიშნა შოიგუმ.
რუსული მედია წერს, რომ ამ კონტექსტში შოიგუმ საქართველოს პარლამენტის თავმჯდომარის, შალვა პაპუაშვილის, ბოლო განცხადება მოიყვანა და აღნიშნა, რომ პაპუაშვილმა „ნათლად და გონივრულად“ განაცხადა: „შესაძლოა, რუსეთთან ესკალაცია გერმანიის ან ლიეტუვის ინტერესებში შედიოდეს, მაგრამ არა საქართველოს ინტერესებში“.
