უახლოეს ხანებში, საქართველოს მთავრობასა და ბოლივუდს შორის ხელშეკრულება გაფორმდება და ინდოელი პროდიუსერები ფილების გადაღებას საქართველოში დაიწყებენ. საინვესტიციო სააგენტოს დირექტორის, ქეთი ბოჭორიშვილის განცხადებით, ხელშეკრულების გაფორმების შემდეგ, კერძოდ კი მაისიდან, ბოლივუდი ფილმების გადაღებას დაიწყებს. საწყის ეტაპზე საუბარია ორი ინდური ფილმის გადაღებაზე.
"ბოლივუდთან" უკვე მიმდინარეობს სცენარის დაზუსტება და როგორც კი სცენარი დაზუსტდება და ლოკაციები შეირჩევა, ხელშეკრულება გაფორმდება. მაისიდან კი გადაღებებიც დაიწყება", - განაცხადა ქეთი ბოჭორიშვილმა.
შეგახსენებთ, რომ იანვარში საქართველოში ბოლივუდის პროდიუსერები უკვე იმყოფებოდნენ. მაშინ ინდოელ პრედიუსერებთან შეხვედრის შემდეგ ეკონომიკისა და მდგრადი განვითარების მინისტრმა განაცხადა, რომ ბოლო პერიოდში ბოლივუდისთვის საზღვარგარეთის ქვეყნებში ფილმების გადაღება პრიორიტეტული გახდა. მინისტრი აცხადებს, რომ ბოლივუდი საქრთველოში იმავე საგადასახადო რეჟიმით ისარგებლებს, როგორც სხვა ნებისმერი უცხოელი ინვესტორი.
"ჩვენ მათ იგივე საგადასახადო პირობებს ვთავაზობთ, თუმცა მაქსიმალურად დავეხმარებით ინფრასტრუქტურის მხრივ. ყველას კარგად გახსოვთ, როდესაც საქართველოში ამერიკული ფილმის გადაღება მიმდინარეობდა, რომელიც რუსეთ-საქართველოს ომს შეეხებოდა, საქართველოს მთავრობა ამერიკელ პროდიუსერებს მაქსიმალურად დაეხმარა ინფრასტრუქტურის მოძიებაში და ეს პროცესი მათთვის საკმაოდ იაფი დაჯდა",- განაცხადა ეკონომიკისა და მდგრადი განვითარების მინისტრმა. ინდოელი პროდიუსერები ამბობენ, რომ საქართველოში ძირითადად ტრილერებისა და ექშენების გადაღებას გეგმავენ და სათანადო სცენარებიც უკვე არსებობს.
2010 წლის ნოემბერში ქართული დელეგაციის ინდოეთში ვიზიტისას, ეკონომიკისა და მდგრადი განვითარების მინისტრი ვერა ქობალიას ინდური კინოს ცნობილ ვარსკვლავს, ამირხანს ესტუმრა. ამირხანმა საქართველოში ჩამოსვლისა და მისი მონაწილეობით ფილმის გადაღების მზადყოფნა გამოთქვა.
