უშიშროების საბჭოს მდივნის მოადგილის, ბათუ ქუთელიას განცხადებით, რუსეთის მიერ საქართველოში სამხედრო ესკალაციის გამეორების საშიშროება არსებობს.
"არსებობს საფრთხე, რომ თავიდან მოხდეს ესკალაცია. რუსეთი ემზადება ამ ქმედებების განხორციელებისთვის. ამის ინდიკატორია ის ვითარება, რომელიც არსებობს და რომელიც დიდად არ განსხვავდება 2008 წლის ვითარებისგან", - განაცხადა ქუთელიამ ნატოს საპარლამენტო ასამბლეის როუზ-როსის 76-ე სემინარზე სიტყვით გამოსვლისას, რომელზეც მან ქართულ-რუსულ კონფლიქტზე ისაუბრა.
ამასთან, უშიშროების საბჭოს მდივნის მოადგილის თქმით, რუსეთის ხელისუფლების მიერ ბოლო პერიოდში საქართველოს მისამართით გაკეთებული განცხადებები და გამოთქმული ბრალდებები, ასევე თბილისსა და სხვა ქალაქებში ბოლო პერიოდში მომხდარი აფეთქებები, რომელთა უკანაც რუსეთის "ეფ-ეს-ბე" აღმოჩნდა, უსაფრთხოების დაუცველობის შეგრძნებას აჩენს.
"საერთაშორისო საზოგადოებამ უნდა მიიღოს ზომები, რომ ომის შედეგები იყოს აღმოფხვრილი (რუსეთს რამდენიმე ორგანიზაციაში ვეტოს უფლება აქვს, თუმცა იმედი გვაქვს, მოსკოვის მიერ მისთის მიუღებელი საკითხების დაბლოკვის მცდელობები ყოველთვის წარმატებით არ დასრულდება). მართალია, საერთაშორისო თანამეგობრობა ცდილობს თავიდან აიცილოს შემდეგი ესკალაცია, მაგრამ ეს არ არის საკმარისი", - განმარტა ქუთელიამ, რომლის აზრითაც, საჭიროა ყველაფერს ეწოდოს თავისი სახელი - ოკუპაციას "ოკუპაცია", ეთნიკურ წმენდას - "ეთნიკური წმენდა".
ამასთან, ქუთელიას თქმით, თუ საქართველოში არსებული კონფლიქტების დარეგულირების პროცესი წარმატებული არ იქნება, ეს ძალიან ცუდ ასახვას ჰპოვებს რეგიონში არსებულ სხვა კონფლიქტებზე და შეამცირებს ამ კონფლიქტების გადაწყვეტის შანსებს.
"თუ პროცესი არ იქნება დინამიური, ამას ექნება უარყოფითი ეფექტი", - აღნიშნა მან.
გარდა ამისა, უშიშროების საბჭოს მდივნის მოადგილემ რუსეთის მიერ საქართველოს წინააღმდეგ აგრესიის დაწყების მიზეზები კიდევ ერთხელ განმარტა და თქვა, რომ მოსკოვის სურვილი მხოლოდ საქართველოს ტერიტორიის 20 %-ის ოკუპაცია არ ყოფილა.
"რუსეთი აგრესიისთვის დიდი ხანი ემზადებოდა. მისი ქმედებების მთავარი მოტივი იყო არა საქართველოს ორი რეგიონის ოკუპაცია, არამედ ჩვენი ქვეყნის დემოკრატიული განვითარების შეჩერება. მას სურდა ამისთვის ხელი შეეშალა, რადგან რუსეთს ეს სფერო თავის ექსკლუზიური გავლენის სფეროდ მიაჩნია", - დასძინა ბათუ ქუთელიამ.
