ნიუ-იორკის შტატის სენატის წევრი კარლ კრუგერი კორუფციისა და ფულის გათეთრების გამო დააკავეს. ამის შესახებ ბი-ბი-სი იტყობინება. სენატორს ყოფილ საბჭოთა კავშირის ემიგრანტებთან ჰქონდა კავშირი. უფრო ადრე კი ნიუ-იორკელმა იურისტმა და ცნობილი რუსული რესტორნის "რასპუტინის" მეპატრონემ მიხეილ ლევიტისმა ფბრ-ის თანამშრომლების მოტყუება აღიარა, რაც აშშ-ში სისხლის სამართლის დანაშაულად მიიჩნევა.
2009 წელს ფბრ-მა ლევიტისს თავისი ფარული წყარო ჯორჯ აბდულა მიუგზავნა, რომელიც ღამის კლუბ eacen nights-ის მფლობელი იყო. აბდულამ ლევიტისს შესჩივლა, რომ მის რესტორანს სპირტიანი სასმელების გამო ნიუ-იორკის შტატის სამმართველომ პრეტენზია წაუყენა. ამიტომ აბდულამ მას გავლენიან დემონსტრანტ-სენატორ კარლ კრუგერთან პროტექცია სთხოვა.
ლევიტისმა აღუთქვა, რომ კრუგერი აბდულას დახმარებას აღმოუჩენს, თუკი ის სენატორის საარჩევნო ხაზინას შეავსებს. ფბრ-ის ფარულმა წყარომ ლევიტისს 3 ათასი დოლარი მიუტანა. ლევიტისმა აღნიშნა, რომ ათას დოლარს შუამავლობისთვის აიღებდა, დანარჩენს კი კრუგერის თანაშემწეს გადასცემდა.
უკვე დიდი ხანია, კრუგერი ფედერალური გამომძიებლების დაჟინებული მეთვალყურეობის ქვეშ იმყოფება.
10 მარტს, დილით სენატორი კრუგერი შვიდ ადამიანთან ერთად ფბრ-ის შტაბ-ბინაში გამოცხადდა, სადაც ისინი ოფიციალური მეთვალყურეობის ქვეშ აიყვანეს. ნიუ-იორკის სამხრეთ ოლქის ფედერალურმა პროკურორმა სპეციალურად გამართულ პრესკონფერენციაზე აღნიშნა, რომ მათ წინააღმდეგ კორუფციის ბრალდებით სისხლის სამართლის საქმე აღიძრა.
შეგახსენებთ, კრუგერი შტატის მესამე სენატორია, რომელიც უკანასკნელი ოთხი წლის განმავლობაში თანამდებობის ბოროტად გამოყენების გამო დაადანაშაულეს.
ოფიციალური მდგომარეობის გამო კრუგერი ნიუ-იორკის ერთ-ერთ ყველაზე გალენიან კანონმდებლად მიიჩნეოდა. იგი მრავალი წლის განმავლობაში ადგილობრივი სენატის ფინანსურ კომიტეტს ხელმძღვანელობდა. იმის გამო, რომ კრუგერის საარჩევნო ოლქი სსრკ-იდან წამოსული ემიგრანტებით იყო დასახლებული, იგი ემიგრანტთა ღონისძიებებს არაერთხელ ესწრებოდა.
ბრალდების სხვადასხვა მუხლით, სენატორ კრუგერს 20 წლამდე პატიმრობა ემუქრება. 2006 წლიდან 2011 წლამდე სენატორი კრუგერი ქრთამს დაუსრულებლად იღებდა, რამაც მთლიანობაში, სულ მცირე, 1 მილიონი დოლარი შეადგინა.
