სალიზინგო კანონმდებლობის სამუშაო ვერსია უკვე მზადაა და მომავალ კვირაში მის დასახვეწად ფინანსთა და იუსტიციის სამინისტროებსა და ეროვნულ ბანკთან მჭიდრო კონსულტიები დაიწყება.
კანონპროექტის დამტკიცება კი, სავარაუდოდ, პარლამენტის საგაზაფხულო შესვენებამდე მოესწრება.
"ბიზნესასოციაციამ" და "საქართველოს ლიზინგის ასოციაციამ" აშშ-ს საერთაშორისო განვითარების სააგენტოს (USAID) პროგრამის - ეკონომიკური აღმავლობის ინიციატივასთან (EPI) პარტნიორობით, სასტუმრო "ბეტსში" სამუშაო შეხვედრა გაიმართა, სადაც ლიზინგის ახალი კანონმდებლობის განხილვა მოეწყო.
შეხვედრაზე განიხილეს ასევე ლიზინგის საერთაშორისო სტანდარტები და ამ სფეროში არსებული თანამედროვე გამოცდილება. ლიზინგის ახალი კანონის შემუშავება, რომლის ინიციატორები მთავრობასთან ერთად კერძო სექტორის წარმომადგენლებიც არიან. კანონპროექტის სამუშაო ვერსიაში გაზიარებულ იქნა ამ სფეროში არსებული საუკეთესო გამოცდილება კერძო სამართლის უნიფიკაციის საერთაშორისო ინსტიტუტის (UNIDROIT) 2008 წლის ლიზინგის კანონის მოდელის შესაბამისად.
პროექტის თანახმად, ცვლილებები შევა კანონმდებლობის ორ ძირითად ნაწილში: სამოქალაქო კოდექსსა და საგადასახადო კოდექსში, რაც ლიზინგში მონაწილე მხარეებს შორის არსებულ უთანასწორობას მოაგვარებს და იმავდროულად, უზრუნველყოფს რისკებისა და შემოსავლების სამართლიან გადანაწილებას და მონაწილე მხარეების უფლებებს დააბალანსებს. საკანონმდებლო პაკეტის მიზანია, რომ ქვეყანაში ლიზინგი სალიზინგო კომპანიებისთვის მომგებიან საქმიანობად აქციოს და ამავე დროს ბიზნესი წაახალისოს და კომპანიებმა ლიზინგი დაფინანსების ალტერნატიულ მექანიზმად გამოიყენონ.
საერთაშორისო ექსპერტი ლიზინგის საკითხებში, რაფაელ ტრიან კასტელი, რომელიც საქართველოში USAID-ის მოწვევით იმყოფება ამბობს, რომ მნიშვნელოვანია, რომ კანონმდებლობის დახვეწის შემდეგ ბიზნესის ინფორმირებულობა მოხდეს.
"ჩემი რეკომენდაცია გახლავთ, რომ ქვეყანაში სამართლებლივი გარემო გაუმჯობესდეს, სამოქალაქო კოდექსის რეგლამენტებეში შესწორებები შევიდეს და ასევე ცვლილებები შევიდეს საგადასახადო კოდექსის ცალკეულ მუხლებში, თუმც არა რეგლამენტში. ასევე მნიშვნელოვანია საბანკო კანონმდებლობის ზოგიერთ დებულებაში შესწორებების შეტანა.
ამ ყველაფრის, საბოლოო მიზანი არის ის, რომ სტიმული მიეცეს არსებულ და ახალ სალიზინგო კომპანიებს, რათა გამოყონ გარკვეული კაპიტალი მცირე და საშუალო საწარმოებისათვის და ასევე სამთავრობო სტრუქტურებისათვის, რითაც ქვეყანა თავის ეკონომიკურ ზრდას უზრუნველყოფს და კონკურენტუნარიანობის გაძლიერებას მოახერხებს.
ჩვენ საქართველოს სამოქმედო გეგმას ვთავაზობთ, რათა ქვეყნის მაშტაბით ტრენინგები ჩატარდეს. ჩვენ ამას შესაძლებლობათა გაფართოებას ვეძახით, რაც ტრენინგებში მცირე ბიზნესების ჩართულობას ითვალისწინებს. ეს კი საჭიროა იმისათვის, რომ ბიზნესმა კარგად გაითავისოს და სალიზინგო ინსტრუმენტების გამოყენება შეძლოს. ასევე მნიშვნელოვანია მოსამართლეთა, საგადასახადო სტრუქტურების წარმომადგენელთა და ყველა იმ პერსონის გადამზადება, ვისაც კი სამომავლოდ ლიზინგთან შეხება ექნება", - განაცხადა საერთაშორისო ექსპერტმა ლიზინგის საკითხებში, რაფაელ ტრიან კასტელმა.
ექსპერტი ამბობს, რომ კანონმდებლობის დახვეწის შემდეგ, ქართულ ბაზარზე საერთაშორისო სალიზინგო კომპანიებიც დაიწყებენ ოპერირებას.
"კანონმდებლობის მოწესრიგება ერთ-ერთი უმნიშვნელოვანესი ფაქტორია იმისათვის, რომ ქვეყანაში საერთაშორისო სალიზინგო კომპანიებიც შემოვიდნენ"- აცხადებს ექსპერტი.
"საქართველოს ლიზინგის ასოციაციის" ხელმძღვანელი და იმავდროულად, "თიბისი ლიზინგის" გენერალური დირექტორი ნანა მიქაშავიძე ამბობს, რომ ლიზინგის კანონმდებლობა თავიდან დაიწერა, რაც საერთაშორისო სტანდარტებთან მაქსიმალურადაა მიახლოებული.
"სალიზინგო კანონი ახლიდან იწერება, რაც საერთაშორისო პრაქტიკაზე იქნება დაფუძნებული. ანუ ეს არ არის მხოლოდ დარგისთვის პრობლემების მოგვარება, არამედ ეს არის საქართველოში ისეთი კანონმდებლობის შექმნა, რომელიც ინვესტიციების მოზიდვას, ბაზრის გააქტიურებას და აქტივზე ხელმისაწვდომობის ზრდას შეუწყობს ხელს", - აცხადებს ნანა მიქაშავიძე.
"საქართველოს ლიზინგის ასოციაციის" ხელმძღვანელი აცხადებს, რომ ქვეყანაში ლიზინგზე მოთხოვნა ფაქტობრივად არ არსებობს.
"თუმცა არსებობს მოთხოვნა ფიქსირებულ აქტივებში ინვესტირებაზე და ფიქსირებული აქტივების განვითარებაზე. ეკონომიკის ზრდა თავისთავად გულისხმობს იმას, რომ კომპანიამ ძირითად აქტივებში ჩადოს ინვესტიცია, გაფართოვდეს და გაიზარდოს, რათქმაუნდა ლიზინგის საშუალებით", - აცხადებს ნანა მიქაშავიძე.
მისი თქმით, ევროპაში მცირე და საშუალო ბიზნესის 34 პროცენტი ლიზინგს მაქსიმალურად იყენებს. მიქაშავიძის თქმით, სლოვენიაში რომელიც საქართველოზე პატარა ქვეყანა, იქ 14 სალიზინგო კომპანია არსებობს, მაშინ როდესაც საქართველოში სულ სამი სალიზინგო კომპანიაა.
შეგახსენებთ, უკან ცნობილი გახდა, რომ ქვეყანაში სალიზინგო სექტორის განვითარებისათვის ახალ კონცეფციაზე მუშაობა დაიწყო. კონცეფციის მიხედვით ჩამოყალიბდება, ახალი საკანონმდებლო ბაზა, რომელიც აქტივების დაფინანსების ახალი წყაროების შექმნას, პროდუქტების განვითარებასა და ამ სფეროში ახალი ტიპის ინვესტიციების მოზიდვას შეუწყობს ხელს.
ამ მიზნით, ფინანსთა მინისტრი სალიზინგო კომპანიების წარმომადგენლებს 2 თებერვალს უკვე შეხვდა, სადაც კახა ბაინდურაშვილმა განაცხადა, რომ ახალი საკანონმდებლო ინიციატივა 2-3 თვეში შემუშავდებოდა.
"სალიზინგო კომპანიის წარმომადგენლებთან შეხვედრის მიზანია, რომ საქართველოში სალიზინგო კანონმდებლობა განვითარდეს. სალიზინგო კომპანიებთან ერთად შევეცდებით, რომ კანონმდებლობაზე 2-3 თვის განმავლობაში ვიმუშაოთ, რომელშიც უცხოელი ექსპერტებიც ჩართვებიან. ჩვენი მიზანია, რომ სალიზინგო სექტორი განვითარდეს, რაც თავის მხრივ საშუალებას მოგვცემს, რომ დაზგა-დანადგარებისა და სხვა ტექნიკა უფრო იაფად იქნეს შეძენილი. რაც თავის მხრივ ბიზნესის ადვილად დაწყების საშუალებას იძლევა",- განაცხადა კახა ბაინდურაშვილმა.
სალიზინგო ბაზრის წარმომადგენლები აცხადებენ, რომ კანონმდებლობის დახვეწის შემდეგ თავად სალიზინგო მომსახურეობის ტარიფებიც გაიაფდება.
ფინანსთა სამინისტროში ფიქრობენ, რომ ახალი პროექტი ხელს შეუწყობს საქართველოს ეკონომიკური განვითარებას, რათა სალიზინგო ბაზრის განვითარებას მნიშვნელოვანი სტიმული მიეცეს.
სამინისტროში განმარტავენ, რომ ახალი კანონმდებლობა ხელს შეუწყობს: ტექნიკის შეძენის ფინანსირების ალტერნატიული, საბანკო სესხებზე იაფი ინსტრუმენტის ჩამოყალიბებას; საერთაშორისო მწარმოებლების ინტერესის გაზრდას საქართველოს ბაზარზე. ეს გაზრდის მათ მიერ საქართველოში იმპორტის მოცულობას და მათ პროდუქციაზე ფასების ხელმისაწვდომობას; საქართველოში სალიზინგო ტრანზაქციების შესაძლებლობის შექმნას, რაც დარგის რეგიონალური განვითარების შესაძლებლობას იძლევა.