ადრე გავრცელებული ინფორმაციით, სასურსათო ვაუჩერების განაღდება ნებისმიერ კომერციულ ბანკში იყო შესაძლებელი, თუმცა მთავრობამ მიიღო გადაწყვეტილება და ვაუჩერის განაღდების უფლება მხოლოდ "ლიბერთი ბანკს" მიანიჭა, რადგანაც ბანკს სოციალური მომსახურების მხრივ დიდ გამოცდილება აქვს (პენსიების დარიგება ხდება "ლიბერთი ბანკის" მეშვეობით).

ვაუჩერების განაღდება 1-ელ ივნისამდეა შესაძლებელი.

სოფლის მეურნეობის მინისტრი აცხადებს, რომ სასურსათო ვაუჩერს მილიონზე მეტი ოჯახი მიიღებს, რაც სურსათზე გაზრდილი ფასების კომპენსაციაა.
"ენერგოვუჩერების შემდგომ მთავრობამ სასურსათო ვაუჩერების დარიგება დაიწყო. სოლიდარობის აქციის ფარგლებში შესაძლებელი იქნება, ამ სასურსათო ვაუჩერების უფრო გაჭირვებული ოჯახებისთვის გადაცემა. სასურსათო ვაუჩერის ღირებულება 30 ლარია და ის საქართველოში მცხოვრებ ყველა ოჯახს გადაეცემა, რაც გაზრდილი ფასების კომპენსირებას მოეხდენს. ჩვენი მიზანია, ვაუჩერები დროულად დარიგდეს, რადგანაც სწორედ ამ პერიოდში არის სურსათზე მომატებული ფასები", - განაცხადა სოფლის მეურნეობის მინისტრმა ბაკურ კვეზერელმა.

მინისტრი აცხადებს, რომ სასურსათო ვაუჩერების დარიგება აპრილის ბოლომდე დასრულდება.

ჯანდაცვის მინისტრის ანდრია ურუშაძის განმარტებით, ენერგოვაუჩერების მსგავსად სასურსათო ვაუჩერების დარიგებისას პრობლემები არ შეიქმნება, რადგანაც თავად სისტემაში პრობლემები აღმოფხვრილია და სოციალური სუბსიდიების სააგენტო ადგილობრივი თვითმართველობის ორგანოებთან, სიების დაზუსებასთან დაკავშირებით, მჭიდროდ თანამშრომლობს.

"სასურსათო ვაუჩერის მიმღები ოჯახების ნუსხა იდენტურია ელექტროვაუჩერების მიმღები ოჯახების ნუსხისა. ამ პერიოდში სიების დაზუსტებაც მოხდა და სასურსათო ვაუჩერების განადება 1-ელ ივლისამდე იქნება შესაძლებელი", - აცხადებს ურუშაძე.
შეგახსენებთ, რომ სასურსათო ვაუჩერისთვის ბიუჯეტიდან 31 429 465.0 ლარი გამოიყო. მთავრობის დადგენილების მიხედვით, სასურსათო ვაუჩერით ისარგებლებენ ის პირები, რომელთაც თავის დროზე ელექტროენერგიის შეღავათის ვაუჩერით ისარგებლეს, მათ შორის დევნილები.
სასურსათო ვაუჩერის განაღდება ერთჯერადად, საბანკო დაწესებულების მეშვეობით იქნება შესაძლებელი.