პენსიონრებთან შეხვედრისას საქართველოს პრეზიდენტი მიხეილ სააკაშვილი ჯანდაცვის რეფორმასაც გამოეხმაურა და ის წლები გაიხსენა, როცა ფულის არქონის გამო სასწრაფო სამსახურის მანქანებს დაზარალებულები საავადმყოფოში არ გადაჰყავდა.
"ის სიტუაცია აღარ არის, როგორც 2003-ში, ქუჩაში სასწრაფო რომ მოვიდოდა, თავს თუ არ წამოყოფდით და არ აჩვენებდით ფულს, არ მიჰყავდით არსად. წელს მილიონზე მეტ ადამიანს აქვს საქართველოში დაზღვევა, რაც ბევრ რამეს ფარავს, მაგრამ კარგად ვიცი,რომ ყველაზე დაუცველი კატეგორია, რომელიც არ შედის ამ კატეგორიაში, შესაძლოა, სრულიად უპატრონო აღმოჩნდეს", _ აღნიშნა სააკაშვილმა.
პრეზიდენტის თქმით, სწორედ იმ ადამიანების დახმარებაა მისი მიზანი, რომლებიც, რეალური გაჭირვების მიუხედავად, სოციალურად დაუცველთა კატეგორიაში არ შედიან.
პრეზიდენტმა აღნიშნა, რომ ქვეყანაში 150-ზე მეტი საავადმყოფო შენდება და ხალხმა ამ საავადმყოფოებით უნდა ისარგებლოს.
"ჩვენ ძეგლებს კი არ ვაშენებთ და ფასადებს, ყველაფერი ეს გვინდა იმისთვის, რომ ჩვენმა ხალხმა ამით ისარგებლოს", _ აღნიშნა პრეზიდენტმა.
შეგახსენებთ, დღეს რუსთავის ბიბლიოთეკაში საქართველოს პრეზიდენტი პენსიონერებს შეხვდა.
