რუსთავის ბიბლიოთეკაში პენსიონერებთან შეხვედრისას საქართველოს პრეზიდენტმა მიხეილ სააკაშვილმა ჩილესა და სინგაპურის საპენსიო მოდელი გაიხსენა. სააკაშვილის თქმით, საქართველოს მთავრობამ ამ ქვეყნებში სპეციალური ჯგუფები გაგზავნა, რათა იქაური წარმატებული საპენსიო მოდელი გადმოეღოთ.
"ჩილეში გავგზავნე ჯგუფები, მინისტრი და რამდენიმე მოადგილე. რამდენიმე მინისტრი და პარლამენტის წევრი კი გავუშვით სინგაპურში, რომ ენახათ მათი საპენსიო მოდელი. ამ ქვეყნებმა დაიწყეს ჩვენზე დაბალი დონიდან და სწორი საპენსიო პოლიტიკით არც პენსიონერი ჰყავთ უკმაყოფილო და მათი ეკონომიკაც ვითარდება", _ აღნიშნა სააკაშვილმა.
პრეზიდენტის თქმით, საქართველოს მთავრობისთვის მნიშვნელოვანი პრიორიტეტია, რომ ჩვენი საზოგადოების პოტენციურად ყველაზე დაუცველ და ამავე დროს ყველაზე დამსახურებულ ნაწილზე _ პენსიონრებზე იზრუნოს.
"ამაზე მნიშვნელოვანი ამოცანა მთავრობასა და პირადად მე არ მაქვს",_აღნიშნა პრეზიდენტმა .
პრეზიდენტმა აღნიშნა, რომ პენსიონერებმა საკუთარი მხრებით მოიტანეს მომავალი თაობა, რაც, სააკაშილის თქმით, მინისტრებმა და დეპუტატებმა არ უნდა დაივიწყონ.
"ბოლოს დ აბოლოს, ეს პოლიტიკური მთავრობაც ამ არჩევნებზე თქვენი მხრებით მოვიდა. ეს არავის უნდა დაავიწყდეს, ვის წინაშე არიან ისინი ვალში და ჩვენ ამ ვალს ბოლომდე გადაგიხდით", _ განაცხადა პრეზიდენტმა.
