თურქეთის ტურისტული ინდუსტრიის წარმომადგენლების განცხადებით, ეგვიპტეში განვითარებული მოვლენები, თურქეთში კურორტებზე ფასებს ზრდაზე გავლენას ვერ მოახდენს. ეს იმ ფონზე, როდესაც ეგვიპტე და თურქეთი ტურიზმის სფეროში უმთავრეს კონკურენტებად არიან მიჩნეულნი.
თურქეთში ამ ეტაპზე ვერ აკონკრეტებენ, ეგვიპტეში განვითარებული მოვლენები თურქეთში ტურისტების ნაკადს რამდენად გაზრდის, თუმცა უნდა აღინიშნოს, რომ ამჟამინდელი მდგომარეობით, ტურისტული ნაკადის ზრდა არ შეინიშნება.
ექსპერტები აცხადებენ, რომ თურქეთში ჯერჯერობით ტურისტული სეზონი გახსნილი არ არის და უცხოელი ტურისტები თურქეთში ჩასვლას აპრილიდან დაიწყებენ.
თურქეთის ხელისუფლების წარმომადგენელთა განცხადებით, ოფიციალური ანკარა არ აპირებს დამატებითი მოგების მიღებას იმ უბედურებიდან, რომელიც არაბულ ქვეყნებს დაატყდა თავს.
ამის მიუხედავად, თურქეთის ტურისტული ინდუსტრიის წარმომადგენლები აცხადებენ, რომ არსებულმა ვითარებამ შესაძლოა მათ ფინანსურ მდგომარეობაზე სასიკეთო გავლენა მოახდინოს.
უნდა აღინიშნოს, რომ 2010 წელს თურქეთში 28 მლნ. უცხოელი ტურისტი იმყოფებოდა, საიდანაც ქვეყნის ეკონომიკამ 20 მლრდ. დოლარის შემოსავალი მიიღო.
სტატისტიკური მონაცემების თანახმად, 2011 წლის იანვარში თურქეთში ჩასული ტურისტების რაოდენობა, გასული წლის ანალოგიურ პერიოდთან შედარებით 20 %-ით გაიზარდა. საანგარიშო პერიოდში თურქეთში ჩასული უცხოელი ტურისტებიდან გერმანელი ტურისტები ჭარბობდნენ. გერმანელი ტურისტების შემდგომ რიცხოვნების მიხედვით, ირანელი, ქართველი და ბულგარელი ტურისტები ლიდერობენ.
