"საქართველოს მნიშვნელოვანი ნაწილი დღესაც ოკუპირებულია. იმპერია, რომელმაც მოაწყო 1921 წლის 25 თებერვალი, ოცნებობს საქართველოს სუვერენიტეტის გაუქმებაზე", - განაცხადა საქართველოს პრეზიდენტმა მიხეილ სააკაშვილმა ოკუპაციის მუზეუმში საქართველოს გასაბჭოების დღესთან დაკავშირებით კადეტთა კორპუსის წარმომადგენლებთან შეხვედრისას.
საქართველოს პრეზიდენტმა აღნიშნა, რომ "იმავე კაბინეტებში, რომლებშიც ეს ტრაგიკული დღე იგეგმებოდა, ისევ ფიქრობენ, როგორ გაიმეორონ 25 თებერვალი".
"მახსოვს, პირველ შეხვედრაზე პუტინმა თავმომწონედ განმიცხადა, რომ ის იჯდა სტალინის კაბინეტში, კრემლში. განსხვავება მხოლოდ ის არის, რომ მაშინ ეს იმპერია იბადებოდა, ახლა კი იგი კვდება და მილევის სტადიაშია. მაშინ ის იწყებდა მოძრაობას მსოფლიო დომინაციისკენ და ამ გზაზე საქართველო იყო ერთი პატარა დაბრკოლება, რომელიც უნდა გადაელახა - ახლა კი მას აქვს დაკარგული გავლენა, მისი პოზიციები დღითიდღე სუსტდება და საქართველო არის ბოლო საშუალება, შეინარჩუნოს პოზიციები ან იმპერიის სტატუსის რაღაც მოჩვენებითობა მაინც", _ აცხადებს სააკაშვილი.
პრეზიდენტის მიმართვას ოკუპაციის მუზეუმში საქართველოს თავდაცვის მინისტრი და საქართველოს პირველი მთავრობის მეთაურის, ნოე ჟორდანიას შთამომავლები და იუნკერების ოჯახის წევრები ესწრებიან.
