"მსურს, მადლიერება გამოვხატო საქართველოს მიმართ ავღანეთში თანამშრომლობის გამო. მიმაჩნია, რომ ეს ძალიან მნიშვნელოვანია,"_აღნიშნა თბილისში ვიზიტად მყოფმა აშშ-ის სახელმწიფო მდივნის მოადგილე ჯეიმს სტაინბერგმა ქართულ მედიასთან საუბრისას.
მისი თქმით, ასეთი გახშირებული ვიზიტები ადასტურებს, თუ რამდენად ღრმა და მყარია ურთიერთობა ამერიკის შეერთებულ შტატებსა და საქართველოს შორის. ამიტომ დიალოგი უნდა გაგრძელდეს იმ თემებზე, რომელიც ორი ქვეყნისთვის საერთო საზრუნავია.
ვიზიტის ფარგლებში ჯეიმს სტაინბერგი პრეზიდენტსა და მის გუნდს, ასევე, სამოქალაქო საზოგადოების წარმომადგენლებს შეხვდა.
მხარეებმა ქვეყნის პოლიტიკური მდგომარეობის, რეფორმების, ახალი კონსტიტუციის შესახებ ისაუბრეს. ამასთან, ორმხრივი თანამშრომლობისა და რეგიონალური პრობლემების შესახებაც იმსჯელეს.
"ჩვენ ქართველი სახელმწიფო მოხელეების აზრს მოვისმენთ. თუმცა, ასევე, მნიშვნელოვანია, მოვისმინოთ სამოქალაქო საზოგადოებისა და პროფესიული კავშირის წარმომადგენლების მოსაზრებებიც იმაზე, თუ რა ხდება აქ, როგორ შეიძლება აშშ საქართველოსთვის კიდევ უფრო კარგი პარტნიორი გახდეს. ამაზე ვსაუბრობთ არა მხოლოდ მთავრობასთან, არამედ ქართველ ხალხთანაც,"_აღნიშნა ჯეიმს სტაინბერგმა.
შეგახსენებთ, სახელმწიფო მდივნის მოადგილის სტატუსით, ეს უკვე ჯეიმს სტაინბერგის რიგით მესამე ვიზიტია საქართველოში. ჩვენს ქვეყანას იგი სომხეთის შემდეგ ეწვია, რის შემდეგაც აზერბაიჯანში გაემგზავრა.
