დიდი ბრიტანეთის საგარეო საქმეთა მინისტრმა ედ მილიბენდმა აშშ-ში, „დიდი ოცეულის“ (G20) წევრი ქვეყნების საგარეო საქმეთა მინისტრების შეხვედრაზე, რუსეთის საგარეო საქმეთა მინისტრი სერგეი ლავროვი მწვავედ გააკრიტიკა.
ამის შესახებ Sky News იუწყება.
ატლანტაში გამართულ შეხვედრაზე მილიბენდმა უშუალოდ ლავროვს მიმართა, რუსეთს აგრესორი უწოდა და უკრაინელების წინააღმდეგ რუსეთის არმიის მიერ ჩადენილი ომის დანაშაულები შეახსენა.
„ნება მომეცით, ეს პირდაპირ ვუთხრა რუსეთის საგარეო საქმეთა მინისტრს - ჩვენ ყველამ ვიცით, ვინ არის ამ ომში აგრესორი. ვისაუბროთ იმაზე, რაც გუშინ დნიპროში, რკინიგზაზე მოხდა. მხოლოდ გუშინ თქვენმა დრონებმა 15 ადამიანი მოკლეს. არსებობს უამრავი მსგავსი შემთხვევა, როდესაც მთელი ამ ომის განმავლობაში უდანაშაულო მშვიდობიანი მოქალაქეები დახოცეთ. ჩვენ ყველამ ვიცით, რომ თქვენ ხართ აგრესორი“, - განაცხადა მილიბენდმა.
ლავროვისადმი მიმართვისას მილიბენდმა ასევე განაცხადა, რომ უკრაინელი ხალხის სიმამაცისა და მოკავშირეების დახმარების წყალობით, რუსეთი ამ ომში ვერ იმარჯვებს.
„პუტინს მაშინ ეგონა, რომ ამ ომს მარტივად მოიგებდა. მაგრამ თქვენ ამ ომს ვერ მოიგებთ. უკრაინელი ხალხის სიმამაცისა და ამ მაგიდასთან წარმოდგენილი ქვეყნების სოლიდარობის წყალობით, თქვენ ვერ გაიმარჯვებთ. სიმართლის თქმისა და სწორი ნაბიჯის გადადგმის გამბედაობა რომ გყოფნიდეთ, პუტინს ეტყოდით, რომ ის ამ ომს ვერ იგებს და ვერც მოიგებს“, - მიმართა დიდი ბრიტანეთის საგარეო საქმეთა მინისტრმა ლავროვს.
შეგახსენებთ, რომ რუსეთის საგარეო საქმეთა მინისტრი სერგეი ლავროვი აშშ-ში ჩავიდა, სადაც „დიდი ოცეულის“ (G20) საგარეო საქმეთა მინისტრების შეხვედრაში მონაწილეობს.
