საზოგადოებისთვის სასარგებლო შრომის შესრულებაში მიღებულ თანხას სასჯელაღსრულების, პრობაციისა და იურიდიული დახმარების საკითხთა სამინისტრო ინფრასტრუქტურის განვითარებაში ჩადებს. აღნიშნულის შესახებ მინისტრმა ხათუნა კალმახელიძემ ადამიანის უფლებათა დაცვისა და სამოქალაქო ინტეგრაციისა და იურიდიულ საკითხთა კომიტეტების გაერთიანებული სხდომაზე "სისხლის სამართლის კოდექსში" ცვლილების შესახებ კანონპროექტის პრეზენტაციის შემდეგ განაცხადა.
დეპუტატ ჯონდი ბაღათურიას კითხვაზე, საზოგადოებისთვის სასარგებლო შრომის ანაზღაურებაში მიღებული თანხა რას მოხმარდება, მინისტრმა აღნიშნა, რომ ნაწილი ინფრასტრუქტურის, ნაწილი კი არასრულწლოვანი მსჯავრდებულებისთვის თავისუფლების აღკვეთის ალტერნატიული სანქციების შემოღებას მოხმარდება.
კანონპროექტის თანახმად, საზოგადოების სასარგებლოდ შრომის სრულფასოვანი აღსრულების და მასზე მჯეროვნი კონტროლის, მათ შორის, ელექტრონული მონიტორინგის განხორციელების მიზნით, პრობაციის ეროვნული სააგენტო უფლებამოსილია გააფორმოს შესაბამისი შეთანხმება/ხელშეკრულება ადგილობრივი თვითმართველობის ორგანოსთან ან/და სხვა დამსაქმებელთან, რომელიც შეიძლება ითვალისწინებდეს მხარეთა მიერ განსაზღვრული მომსახურების საფასურის გადახდის ვალდებულებას. ამ პუნქტის შესაბამისად მიღებული საფასური მოხმარდება პრობაციის ეროვნულ სააგენტოს ამ და სხვა მიზნების განხორციელებას.
