დიასპორის საკითხებში სახელმწიფო მინისტრის აპარატში კავკასიის საკითხზე მომუშავე სპეციალური კომისია შეიქმნება.
აღნიშნული ინიციატივა დიაპოსრისა და კავკასიის საკითხებში საპარლამენტო კომიტეტის თავმჯდომარეს, ნუგზარ წიკლაურს ეკუთვნის, რომელიც დღევანდელ სხდომაზე გაახმაურა.
"ჩვენ ვფიქრობთ, რომ მნიშვნელოვანი და აუცილებელია სახელმწიფო მინისტრის აპარატში შეიქმნას რაიმე სახის ორგანიზმი - სამუშაო ჯგუფი, რომელიც უშუალოდ კავკასიის საკითხების შესწავლით იქნება დაკავებული", - განაცხადა ნუგზარ წიკლაურმა.
მისივე განმარტებით, აღნიშნული კომისიის მუშაობაში არასამთავრობო ორგანიზაციებიც უნდა ჩაერთონ და სწორედ მათთან ერთად მომზადდეს სხვადასხა პროექტები.
აღსანიშნავია, რომ საპარლამენტო კომიტეტის აღნიშნულ ინიციატივას სხდომაზევე გამოეხმაურა დიასპორის საკითხებში სახელმწიფო მინისტრი პაპუნა დავითაია, რომელიც სხდომაზე იყო მიწვეული. დავითაიამ კავკასიის საკითხებზე მომუშავე სამუშაო ჯგუფის შექმნის იდეა მოიწონა.
"შეიძლება, რომ ჩემი ბრძანების საფუძველზე, დროის მცირე მონაკვეთში შეიქმნას კომისია, რომელიც კავკასიის საკითხებზე იქნება ორიენტირებული. ეს ერთგვარი ასახვა იქნებოდა პარლამენტში მიმდინარე პროცესისა აღმასრულებელ ხელისუფლებაში", - განმარტა დავითაიამ, რომელმაც კომისიის მუშაობაში არასამთავრობო ორგანიზაციებისა და დამოუკიდებელი ექსპერტების ჩართვაზეც თანხმობა განაცხადა.
აღსანიშნავია, რომ დიასპორისა და კავკასიის საკითხებში საპარლამენტო კომიტეტის დღევანდელ სხდომაზე განსახილველ საკითხს სწორედ კავკასიაში არსებული ვითარება წარმოადგენდა.
