ლიბიაში დარჩენილი საქართველოს მოქალქეების ევაკუაცია ამ დრომდე ვერ ხერხდება. "თურქიშ ეირლაინის" თვითმფრინავს ტრიპოლიში დაჯდომის უფლებას ადგილობრივი ხელისუფლება ჯერაც არ აძლევს. ამის შესახებ "ჯი-ეიჩ-ენს" ლიბიაში მყოფმა თინათინ ვერულაშვილმა აცნობა.
"კომპანია, რომელშიც ჩემი მეუღლე მუშაობს, ყველა თანამშრომლის ევაკუაციას ცდილობს. კომპანიის მიზანია თურქეთში გადავფრინდეთ ჩარტერული რეისით, რომელსაც თურქეთი ოფიციალურად ნიშნავს. თვითმფრინავი თურქეთიდან ტრიპოლში დღეს უნდა ჩამოფრენილიყო, მაგრამ არ მოხერხდა, რადგან აქ დაჯდომის უფლება ვერ მიიღო", _ აცნობა "ჯი-ეიჩ-ენს" თინათინ ვერულაშვილი.
მისი განცხადებით, მეორე ვარიანტად კომპანია განიხილავს მოქალაქეების ტუნისში გადაყვანას და იქიდან თვითმფრინავით თურქეთში გამგზავრებას.
შეგახსენებთ, რომ თინათინ ვერულაშვილი მეუღლესთან და 8 წლის ვაჟთან ერთად ლიბიის საზღვრების დატოვებას და სამშობლოში დაბრუნებას ვერ ახერხებს.
ვერულაშვილის განცხადებით, მისი მეუღლე კლიფორდ ვინსტონი და შვილი ბექა ვინსტონი ასევე საქართველოს მოქალაქეები არიან.
არსებული ინფორმაციით, ლიბიის დედაქალაქ ტრიპოლში ოთხი ქართველი იყოფება, მათ შორის ორი ქალია. ისინი ლიბიაში თურქული კომპანიის დაკვეთით მუშაობდნენ. ამ დროისთვის საქართველოს მოქალაქები ტრიპოლის ერთ-ერთ სასტუმროში იმყოფებიან, რომელოსაც სამხედრო ქვედანაყოფები იცავენ.
საქართველოს საგარეო საქმეთა სამინისტროს ინფორმაციით, საქართველოს მოქალაქეები ტრიპოლში უსაფრთხოდ იმყოფებიან და მათ სამშობლოში დაბრუნებას თურქული კომპანია უზრუნველყოფს, რომელმაც ქართველები სამუშაოდ დაიქირავა.
საგარეო უწყება მოუწოდებს საქართველოს მოქალაქეებს, თავი შეიკავონ იმ ქვეყნებში გამგზავრებისაგან, სადაც არასტაბილური ვითარებაა.
