"საქართველო არ აპირებს გალის რაიონის მცხოვრებლის, ტერორისტი მერაბ ყოლბაიას, ზედმეტსახელად "კოჭოს", გათავისუფლებას", - განაცხადა საქართველოს შს სამინისტროს ანალიტიკური დეპარტამენტის უფროსმა შოთა უტიაშვილმა ჟურნალისტებთან საუბარში.
მისი თქმით, საქმე ლოგიკურ დასასრულამდე მივა, ამიტომ ყოლბაიას გადაცემას აფხაზური და რუსული მხარისათვის არავინ აპირებს.
"ტერაქტების მოწყობაში ბრალდებულებმა უკვე აღიარეს დანაშაული და ყოლბაიას, ბორისოვისა და ცხადაიას გვარები დაასახელეს. ყოლბაია უკვე დავაკავეთ და მოვითხოვთ ბორისოვისა და ცხადაიას გადაცემას, თუმცა სოხუმი უარს აცხადებს ჩვენი ამ მოთხოვნის შესრულებაზე.
შეგახსენებთ, რომ აფხაზი სეპარატისტები და რუსი ოკუპანტები ტერაქტების ორგანიზებაში ბრალდებული მერაბ ყოლბაიას გათავისუფლებას მოითხოვენ. ეს მოთხოვნა აფხაზმა სეპარატისტებმა და ოკუპანტებმა ქართულ მხარეს გალში ინციდენტების პრევენციისა და მათზე რეაგირების სამუშაო ჯგუფის შეხვედრაზე წამოუყენეს და საქართველოში ტერაქტების სერიის ორგანიზებაში ბრალდებული გალის რაიონის მაცხოვრებლის მერაბ ყოლბაიას, ზედმეტსახელად "კოჭოს" გათავისუფლება მოსთხოვეს.
სეპარატისტების მტკიცებით, მერაბ ყოლბაია საქართველოს სპეცსამსახურებმა გაიტაცეს და საქართველოს ტერიტორიაზე ტერაქტების სერიის ორგანიზება დააბრალეს.
