გარემოს დაცვისა და ბუნებრივი რესურსების სამინისტროსგან აბრაც აღარ დარჩა და ის მხოლოდ ფურცელზე არსებულ სამინისტროდ იქცა. ამის შესახებ გარემოს დაცვის სამინისტროს რეორგანიზაციასთან დაკავშირებით გაკეთებული შეფასებისას ფრაცქია ქრისტიან-დემოკრატების თავმჯდომარემ გიორგი ახვლედიანმა აღნიშნა.
"იმ ფორმით, რა ფორმითაც ხდება გარემოს დაცვისა და ბუნებრივი რესურსების სამინისტროს დაქუცმაცება დილეტანტიზმია. წინააღმდეგ შემთხვევაში უწყების ფუნქციები არ გადეცემოდა იმ სამინისტროებს, რომელთანაც ინტერესთა კონფლიქტში მოდის. თუნდაც ეკონომიკისა და მდგრადი განვითარების სამინისტროსთვის დაცული ტერიტორიების გადაცემა პირდაპირ ინტერესთა კონფლიქტში მოდის აღნინშულ უწყებასთან, რადგან ეკონომიკის სამინისტროს ინტერესებში არ შედის დაცული ტერიტორიები და მათი დიანტერესების საგანს წარმოადგენს ტურისტული ინფრასტრუქტურის განვითარება, რომელიც სწორედ გარემოს დაცვის სამინისტრომ უნდა შებოჭოს", - განაცხადა ახვლედიანმა.
მისივე თქმით, ასევე ტყეები ენერგეტიკის სამინისტროსთვის მხოლოდ შეშაა, ხოლო გარემოს დაცვისთვის ჟანგბადი.
"იმ დროს როდესაც ენერგეტიკის სამინისტროს ლიცენზიების გაცემის უფლება მიეცემა ტყეები და ხეობების პრივატიზება დაიწყება", - აღნიშნა ახვლედიანმა.
ახვლედიანმა აღნიშნა, რომ, მიუღებელია რეგიონალური განვითარებისა და ინფრასტრუქტურის სამინისტროსთვის ნაპირსამაგრი საკითხების გადაცემა, რადგან იფრასტქრუქტურის მოსაწყობად ისინი ინერტულ მასალებს მდინარიდან ყოველგვარი კონტროლის გარშე იღებენ, რასაც შემდეგ ეკოლოგიურ კატასტროფამდე მიჰყავს.
"გარემოს დაცვის ინსპექციის ბედი ამ დრომდე გაურკვეველია და ჯერჯერობით არ ვიცით სად უპირებენ თავი შეაყოფინონ. გარემოს დაცვის სამინისტროსგან ფაქტიურად აბრაც აღარ დარჩა და ის მხოლოდ ფურცელზე არსებული სამინისტროა, რომელიც იმიტომ შენარჩუნდა, რომ ქვეყანას საერთაშორისო ვალდებულებები აქვს აღებული. ამ დროს კი სახელმწიფო ინტერესების სრული უგულებელყოფა ხდება. დასძინა ოპოზიციონერმა დეპუტატმა.
მისივე შეფასებით, აუცილებელია გარემოს დაცვის სამინისტროს რეორგანიზაცია შეჩერდეს და გარემოს დაცვის საკითხებზე მომუშავე ექსპერტებთან და არასამთავრობო ორგანზიაციებთან ხელისუფლებამ კონსულტაციები დაიწყოს.
