საქართველოს პარლამენტის დეპუტატებმა 1921 წელს წითელ არმიასთან ბრძოლის დროს დაღუპულ იუნკერების ხსოვნას პატივი მიაგეს.
როგორც იუნკერების მემორიალური დაფის გვირგვინით შემკობის შემდეგ პარლამენტის პირველმა ვიცე-სპიკერმა მიხეილ მაჭავარიანმა განაცხადა, 90 წლის წინ ამ დროს თბილისის მიდამოებში მიმდინარეობდა ბრძოლა დამოუკიდებლობისთვის, ღირსებისთვის, რომელსაც ქართველი ვაჟკაცები შეეწირნენ.
"ეს კვირა 90 წლის წინ საკმაოდ რთული და მძიმე იყო საქართველოსთვის. 500 ქართველი იუნკერი ხუთი დღის განმავლობაში ვაჟკაცურად ებრძოდა მრავალათასიან წითელ არმიას, რომელშიც სამწუხაროდ ასევ იყვნენ ქართველი ჯარისკაცებიც. 1996 წელს კი ზურაბ ჟვანიას ინიციატივით ამ ადგილზე დაფა განთავსდა, რადგან ეს არის ჩვენი სამწუხარო რეალობა, რომ ამ შენობის ქვეშ განისვენებენ ის ვაჟკაცები, რომლებიც საქართველოს იცავდნენ თავის სისხლით. ამავე დროს წითელ არმიაში იყვნენ შეცდენილი ადამიანებიც, ვინც საქართველო დამოუკიდებლობას ებრძოდნენ", - აღნიშნა მაჭავარიანმა.
მისი თქმით, 1921 წლის 21 თებერვალს საქართველოს დამფუძნებელმა კრებამ პირველი კონსტიტუცია მიიღო, მაშინ, როდესაც კოჯორში წითელი არმია იყო მომდგარი.
"ქართული სახელმწიფოს დამფუძნებლები დარწმუნებულები იყვნენ, რომ უნდა მიღებულიყო პირველი დოკუმენტი რათა საქართველოს სახელმწიფო კონსტიტუციის ჩარჩოებში დაფიქსირებულიყო. ჩვენ, დღევანდელ პარლამენტს და ხელისუფლებას ძალიან გვინდა, რომ ეს არასდროს არ გამეორდეს და ჩვენ სახელმწიფოს არასდროს არ დაემუქროს საფრთხე", - აღნიშნა მაჭავარიანმა.
