რუსეთის ფედერაციის ნაციონალური ანტიტერორისტული კომიტეტის ინფორმაციით, ყაბარდო-ბალყარეთში კონტრტერორისტული ოპერაციის ჩატარებისას სამართალდამცავებმა ჩრდილოკავკასიელი მებრძოლების ბაზა აღმოაჩინეს, სადა იმყოფებოდა დიდი რაოდენობის საკვები, მილიციის ფორმა და იარაღი. ეს განცხადება რუსულ მედიასთან საუბარში ანტიტერორისტული კომიტეტის წარმომადგენელმა ნიკოლაი სინცოვმა გააკეთა.
"აღმოჩენილი ბაზა რვა ადამიანისათვის იყო განკუთვნილი, იგი კარგად იყო შენიღბული და საცხოვრებლად წელიწადის ნებისმიერ დროს ვარგისი იყო", - განაცხადა სინკოვმა და დასძინა, რომ იქ აღმოჩენილია მილიციის ფორმა, კალაშვიკოვის ავტომატები და ტყვია-წამალი - "რომელიც გამოსაყენებლად მზად იყო".
მისივე თქმით, კონტრტერორისტული ოპერაცია ამ რაიონში გრძელდება.
შეგახსენებთ, რომ ყაბარდო-ბალყარეთის ელბრუსის რაიონს, სადაც რუსული მედიის ინფორმაციით, ჩრდილოკავკასიელი მებრძოლების 7 კაციანი ჯგუფია გამაგრებული ავიაცია ბომბავს. რაიონი ასევე იცხრილება ნაღმმტყორცნებიდან.
დაბომბვის შემდეგ რუსეთის შს სამინისტროს შინაგანი ჯარის სპეცდანიშნულების ბატალიონის წარმომადგენლებმა ადგილის გაწმენდა-დაზვერვა დაიწყეს ბანდიტური დაჯგუფების წევრთა გამოსავლენად. ამ დროისათვის ბოევიკების ცხედრები აღმოჩენილი არ არის. მცირე ხნით ადრე მომხდარ შეტაკებაში კი გარდაცვლილია სპეცდანიშნულების ბატალიონის ერთი და დაჭრილია ხუთი მებრძოლი. ბოევიკების შესაძლო ადგილსამყოფელთან დამატებითი ძალაა გამოძახებული. ოპერაცია მანამდე გაგრძელდება, ვიდრე ჯგუფს არ გაანადგურებენ.
