ამერიკის პროგრესის ცენტრის ექსპერტები აშშ-ს მიერ საქართველოსთვის შეიარაღების მიყიდვის იდეას იწუნებენ. როგორც გამოცემა " EURASIANET "-ი წერს, ამის შესახებ ამერიკული ანალიტიკური ორგანიზაციის ექსპერტების მიერ შემუშავებულ ახალ ანგარიშშია ნათქვამი.
დოკუმენტის ავტორების შეფასებით, აშშ-ს მიერ საქართველოსთვის შეიარაღების მიყიდვა "ბერლინის კედლის" მენტალიტეტს განამტკიცებს.
"ავტორებს მიაჩნიათ, რომ აშშ-ს მიერ შეიარაღების მიყიდვა ცუდი იდეაა, არა მარტო იმიტომ, რომ ის საქართველოს შეტევისკენ წააქეზებს, არამედ იმიტომაც, რომ ის "ბერლინის კედლის" მენტალიტეტს განამტკიცებს, რაც ნიშნავს ისეთ პოლიტიკას, როცა ჯიუტად არ ცვალი პოზიცია და უარს ამბობ თანამშრომლობაზე", - წერს ჟურნალისტი ჯოშუა კუცერა.
მისივე მტკიცებით, ანგარიშის ავტორები ფიქრობენ, რომ საქართველოსთვის იარაღის მიწოდება და მხარდაჭერა მხოლოდ გაართულებს საქართველოს ტერიტორიული მთლიანობის მშვიდობიანი აღდგენის პროცესს.
"აშშ-ს მთავარი მიზანი კი უნდა იყოს კონფლიქტების მშვიდობიანი გადაწყვეტა საქართველოს საყოველთაოდ აღიარებული საზღვრების ფარგლებში, ხოლო ამ მიზნების მისთვის შეიარაღების მიყიდვა საუკეთესო შემთხვევაში ირელევანტური და შექმნილ ვითარებაში მთავარი შემაფერხებელი ფაქტორი იქნებოდა. შეიარაღების მიყიდვა შექმნიდა შთაბეჭდილებას, რომ შეერთებული შტატები ემხრობა ერთ მხარეს და ეწინააღმდეგება ყველა აქტორის მორიგებას. გარდა ამისა, ეს ნაბიჯი გამოიწვევდა კონფლიქტის ზონის შემდგომ მილიტარიზაციას, რაც, როგორც ცნობილია, მადესტაბილიზებელი ფაქტორია. არსებობს რუსეთის ქცევის გამოსწორების სხვა გზები, კერძოდ კი, ორმხრივი ურთიერთობების გაუმჯობესება და შესაბამისი სტიმულების შექმნა, რასაც ნეგატიური გავლენა არ ექნებოდა კონფლიქტის გადაწყვეტის პროცესზე", - გამოცემის მტკიცებით, ნათქვამია აღნიშნულ ანგარიშში.
შეგახსენებთ, რომ ამერიკის კონგრესის ცენტრის ექსპერტებმა "საქართველოს კონფლიქტის მოგვარებაში აშშ-ს როლის" შესახებ ანგარიში გასულ კვირას გამოაქვეყნეს.
