საქართველოს პარლამენტი პროკურატურას ზვიად გამსახურდიას გარდაცვალების მიზეზების დამდგენი კომისიის მიერ გამოვლენილი ახალი ფაქტების გამოყენებისა და სათანადო რეაგირების მოხდენის რეკომენდაციას აძლევს. აღნიშნულთან დაკავშირებით დადგენილება პარლამენტმა პლენარუს სხდომაზე 75 ხმით, 0-ს წინააღმდეგ მიიღო.
თავდაპირველად დადგენილების პროექტში ნათქვამი იყო, რომ პარლამენტს მთავარი პროკურატურისთვის აღნიშნული "თხოვნით" უნდა მიემართა, თუმცა "ქრისტიან-დემოკრატ" ლევან ვეფხვაძის მოთხოვნით, ტერმინი "თხოვნა" ამოიღეს, რასაც საპარლამენტო უმრავლესობაც დაეთანხმა.
ვეფხვაძემ მოითხოვა დადგენილების პროექტშივე დათქმულიყო ვადები, რომლის ფარგლებში პროკურატურას საქმის მიმდინარეობის შესახებ, პარლამენტისთვის ინფორმაცია უნდა მიეწოდებინა.
აღნიშნულთან დაკავშირებით, უმრავლესობის წევრმა ლაშა თორდიამ აღნიშნა, რომ ვადების დათქმა აუცილებელი არ არის, რადგანაც პარლამენტს დადგენილების შესრულებაზე მონიტორინგის უფლება ისედაც აქვს და შეეძლება ინფორმაცია პროკურატურიდან ნებისმიერ დროს გამოითხოვოს.
