თბილისის საკრებულოს ქრისტიან-დემოკრატმა წევრმა ადამიანის უფლებების დაცვის კომისიის თავმჯდომარის მოადგილემ ზაზა გაბუნიამ პრესკონფერენცია გამართა, რომელზედაც მთავარ პროკურორს მიმართა და წყნეთის ბავშვთა სახლში ომბუდსმენის ანგარიშის მიხედვით არსებულ კანონდარღვევებზე რეაგირება მოსთხოვა.
2010 წლის იანვარში პრევენციის ეროვნული მექანიზმის ფარგლებში სახალხო დამცველის აპარატის სპეციალურმა პრევენციულმა ჯგუფმა განახორციელა მონიტორინგი ბავშვთა სააღმზრდელო დაწესებულებებში. მონიტორინგის მიხედვით, წყნეთის ბავშვთა სააღმზრდელო დაწესებულებაში დაფიქსირდა არასათანადო მოპყრობის ფაქტები, რომელიც გამოვლინდა აღსაზრდელთა ცემაში, ფიზიკურ და ფსიქოლოგიურ ზემოქმედებაში, ოთახში გამოკეტვასა და საკვების არმიცემაში.
"მე ვთხოვ მთავარ პროკურორსა და პროკურატურას ამ ფაქტებთან დაკავშირებით დაიწყოს მოკვლევა შემდგომი სამართლებრივი რეაგირების მიზნით, რათა შეიქმნას მყარი პრეცედენტი მოძალადეთა დასჯისა, რომლის მიზანი ასეთი ტიპის დაწესებულებებში აღსაზრდელებისთვის უსაფრთხო და მშვიდი გარემოს უზრუნველყოფა იქნება", - განაცხადა გაბუნიამ.
გაბუნიას ოფიციალური მიმართვა მთავარი პროკურატურისადმი დღესვე გაიგზავნა მურთაზ ზოდელავას სახელზე.
