გარემოს დაცვისა და ბუნებრივი რესურსების მინისტრი გოგა ხაჩიძე, გარემოს დაცვის სამინისტროს არსებული მოდელით, არადამაკმაყოფილებელ მუშაობაზე ალაპარაკდა. ხაჩიძე ამბობს, რომ სამინისტროს ფუნქციები საკმაოდ "გაბერილი" იყო.
"გარემოს დაცვის სამინისტროში რეორგანიზაციის პროცესი მიმდინარეობს და საკითხი განსახილველად უკვე პარლამენტშია შეტანილი. რეფორმირებული გარემოს დაცვის სამინისტრო, გარემოს დაცვის სტრუქტურის სახით ჩამოყალიბდება და გარემოს დაცვით საკითხებზე უფრო მეტი კონცენტრირების საშუალება გვექნება"- მინისტრი ამბობს, რომ გარემოს დაცვისა და ბუნებრივი რესურსების სამინისტროს სფერო იყო საკმაოდ ფართო.
"სფერო იყო ძალიან დიდი და მრავალმხრივი. 2010 წლის, ბოლო თვე სამინისტროს თანამშრომლები დავრბოდით იმაზე, თუ როგორ მიგვეტანა საოკუპაციო ზონაში მცხოვრები ადამიანებისათვის შეშა. ამ მიმართულებით ვიყავით გადართული და ამ ყველაფერს ერთი სამინისტრო ვერ აუდიოდა"- აცხადებს გოგა ხაჩიძე.
მინისტრი არ აკონკრეტებს, რეორგანიზაციის შემდეგ შეინარჩუნებს თუ არა პოსტს.
"მთავრობა არის საკმაოდ მოქნილი იმისათვის, რომ მიღებულ იქნეს საკმაოდ თამამი გადაწყვეტილებები და რაღაც საკითხები გადაიხედოს.
ვფიქრობ, რომ ეფექტური მმართველობა განხორციელდება, რასაც შედეგი მოყვება"- აცხადებს გარემოს დაცვისა და ბუნებრივი რესურსების მინისტრი.
