22 თებერვალს ვისოლმა ქუთაისში გრიშაშვილის ქუჩაზე ოთხმოცდამეათე ავტოგასამართი სადგური და ლეგენდარული საფეხბურთო კლუბის „ტორპედო ქუთაისის" სახელობის სკვერი გახსნა. აქვე გუნდის ახალი შემადგენლობის პრეზენტაციაც მოეწყო.
„ტორპედო ქუთაისმა" განსაკუთრებულად ნახევარდაცვა გააძლიერა და გრიგოლ დოლიძე და ლუკა გუგუჩია ზუგდიდის „ბაიადან", ლაშა ქებაძე, დათო კირკიტაძე და ლევან ბაკურაძე სამტრედიიდან, ნიკა მაისურაძე ცხინვალის „სპარტაკიდან", რეზო გოცირიძე კი ბოლნისის „სიონიდან" გადმოიბირა. გუნდის დაცვის გასაძლიერებლად „ტორპედო ქუთაისმა" აზერბაიჯანიდან გიორგი სეთურიძე მოიწვია და თავდასხმაში ზუგდიდის „ბაიადან"გიორგი მეგრელაძე დაიმატა. მეკარეეების მწრთვნელად დავით გვარამაძე დაინიშნა.
პრეზენტაციას ქუთაისის მერი გია თევდორაძე და იმერეთის გუბერნატორი ლაშა მაქაცარია დაესწრნენ.
თანამედროვე, განსხვავებული დიზაინის ავტოგასამართ სადგურზე, რომელსაც შადრევანიც ამშვენებს, ნავთობპროდუქტების ფართო არჩევანის და უმაღლესი ხარისხის მომსახურებების გარდა „სმარტ კაფეც" იფუნქციონირებს. ახალ ავტოგასამართ სადგურზე ევრო ხუთი სტანდარტის იტალიური აპიც გაიყიდება და სასიამოვნო გარემო მომხმარებელს მომსახურების სრულ კომფორტს შეუქმნის. ახლადაგახსნილი ავტოგასამართი სადგური თავისი არქიტექტურითა და დიზაინით სრულიად განსხვავებულია საქართველოში არსებული ანალოგიური ობიექტებისაგან. სადგურის მოსაპირკეთებლად ძვირადღირებული მასალები იტალიიდან იქნა ჩამოტანილი.
ახლადგახსნილ ავტოგასამართ სადგურზე 30-მდე ადამიანი დასაქმდა. ვისოლის ავტოგასამართ სადგურზე დასაქმებული ყველა თანამშრომელი დაზღვეულია და უფასო კვებით სარგებლობს.
ვისოლი სხვადასხვა მიმართულებით მუშაობს ქუთაისში. ამჟამად კომპანია ხუთ ავტოგასამართ სადგურს ფლობს, ავითარებს სუპერმარკეტი "სმარტის" ქსელს, ქმნის საფეხბურთო ინფრასტრუქტურას, მხარს უჭერს „ტორპედო ქუთაისს" და მუშაობს თანამედროვე საცურაო აუზის კონცეფციის განვითარებაზე.
