ევროკომისიის პრეზიდენტი ურსულა ფონ დერ ლაიენი აშშ-ის მიერ სისხლის სამართლის საერთაშორისო სასამართლოს (ICC) პრეზიდენტისა და მაღალი რანგის იურისტის წინააღმდეგ სანქციების დაწესებას ეხმიანება..
ფონ დერ ლაიენი აცხადებს, რომ, ევროპული საბჭოს პრეზიდენტთნ, ანტონიუ კოშტასთან ერთად, სრულ მხარდაჭერას უცხადებს სისხლის სამართლის საერთაშორისო სასამართლოს, მის პრეზიდენტს და გუნდს.
„ევროპული საბჭოს პრეზიდენტი, ანტონიო კოშტა და მე მტკიცედ ვუჭერთ მხარს სისხლის სამართლის საერთაშორისო სასამართლოს, მის პრეზიდენტს და ოფიციალურ პირებს, რომლებიც მის მისიას იცავენ. სისხლის სამართლის საერთაშორისო სასამართლო მსოფლიოში ყველაზე მძიმე დანაშაულების მსხვერპლთათვის მართლმსაჯულების აღსრულებას ხელს უწყობს. ამ მნიშვნელოვანი საქმიანობის განსახორციელებლად, მის მოსამართლეებსა და ოფიციალურ პირებს, გარე ზეწოლის გარეშე, დამოუკიდებლად მოქმედება უნდა შეეძლოთ“, - წერს ევროკომისიის პრეზიდენტი X-ზე.
როგორც ცნობილია, აშშ-მა სისხლის სამართლის საერთაშორისო სასამართლოს (ICC) პრეზიდენტისა და მაღალი რანგის იურისტის წინააღმდეგ სანქციები დააწესა. აშშ-ის სახელმწიფო მდივნის, მარკო რუბიოს განცხადებით, სანქციები დაუწესდა ICC-ს პრეზიდენტს, იაპონელ ტომოკო აკანეს და სასამართლოს უფროს იურისტს, სენეგალელ აბდულაიე სეიეს. რუბიოს თქმით, სისხლის სამართლის საერთაშორისო სასამართლოს ოფიციალური პირები უშუალოდ მონაწილეობდნენ მცდელობებში, გამოეძიებინათ, დაეპატიმრებინათ, დაეკავებინათ ან სისხლის სამართლის პასუხისგებაში მიეცათ იმ ქვეყნების ოფიციალური პირები, რომელთა მთავრობებსაც ICC-ს იურისდიქციაზე თანხმობა არ განუცხადებიათ.
