საპარლამენტო უმრავლესობის წევრი აკაკი მინაშვილი კოლეგებს მოუწოდებს, სასამართლო სისტემას საკუთარი პოლიტიკური ქულებისთვის ნუ გამოიყენებენ.
ეს მოწოდება მინაშვილმა დღეს პარლამენტის სესიაზე მას შემდეგ გააკეთა, რაც ,,ქრისტიან-დემოკრატებმა" ბოლო პერიოდში მოსამართლეების მიერ გამოტანილი გადაწყვეტილებები მკაცრად გააკრიტიკეს.
მინაშვილის თქმით, ტენდეციად იქცა, რომ სასამართლო თუ ოპოზიციის სასარგებლოდ მისაღებ გადაწყვეტილებას გამოიტანს, მაშინ ობიექტურია და თუ საწიინააღმდეგოს მიიღებს მაშინ არ მოსწონთ.
"მოდად იქცა უკვე პოლიტიკოსების მხრიდან სასამართლოს გაკრიტიკება. პოლიტიკურ ძალებს მოვუწოდებ სასამართლოს საკუთარი მიზნებისთვის ნუ გამოიყენებენ", - აღნიშნა მინაშვილმა.
მინაშვილმა ,,ქრისტიან-დემოკრატებს" მოუწოდა, სანამ სასამართლოსთან დაკავშირებით განცხადებებს გააკეთებენ, მანამდე სასამართლო რეფორმების ნდობის დინამიკას და სტატისტიკას გაეცნონ.
",დარწმუნებული ვარ, თქვენი არცერთი წარმომადგენელი არცერთ სასამართლო პროცესს არც დასწრებია და არც დაესწრება. შესაბამისად, სანამ სასამართლოზე ისაუბრებთ კონკრეტული წინადადებები წარმოადგინეთ და მონაწილეობა მიიღეთ გადაწყვეტილებების მიღებაში,~ - განაცხადა მინაშვილმა.
