ჰავიერ სოლანამ საგარეო პოლიტიკის საკითხებში ევროკავშირის უმაღლესი კომისრის თანამდებობაზე თავისი მუშაობა დაასრულა. ესპანეთის ყოფილი საგარეო საქმეთა მინისტრი ევროპულ დიპლომატიას ათ წელზე მეტი დროის განმავლობაში ხელმძღვანელობდა. სოლანა ამ თანამდებობაზე ნატოს გენერალური მდივნის თანამდებობიდან მივიდა.
"დღეს ჩემი მანდატი იწურება, მინდა ყველას მადლობა გადაგიხადოთ, განსაკუთრებით პრესასა და მედიას იმ ინტერესისათვის, რომლითაც ისინი თვალყურს ადევნებდნენ ჩვენს მუშაობას ბოლო ათი წლის განმავლობაში",_ განაცხადა ჰავიერ სოლანამ თავის დასამშვიდობებელ სიტყვაში.
მისივე თქმით, ამ წლების განმავლობაში ევროკავშირი "გლობალური მოთამაშე გახდა საერთაშორისო პოლიტიკაში და ჩვენი ხმა დღეს ყველა კონტინენტზე ისმის".
"ჩვენ შევქმენით ერთიანი საგარეო პოლიტიკა მისი ცხოვრებაში განხორციელების ყველა მექანიზმით. ევროკავშირი აქტიურად იმუშავებს იმისათვის, რომ მსოფლიოში ადამიანთა ცხოვრება გაუმჯობესდეს. მედიამ საკვანძო როლი ითამაშა ჩვენი საქმიანობის განხილვისას და დარწმუნებული ვარ, რომ მედია თავის მუშაობას ასევე გააგრძელებს",_ განაცხადა სოლანამ.
