ქართული მხარე ამერიკის კონგრესის ცენტრის ექსპერტების მიერ საქართველოს კონფლიქტების მოგვარების გეგმის შემუშავებას მიესალმება და იმედს გამოთქვამს, რომ ეს აღმშენებლობაში, რომელსაც რეგიონში უსაფრთხოების მიმართ აშშ-ის პოლიტიკა ჰქვია, დამატებითი ქვა იქნება.
"თავისთავად, ჩვენთვის მისასალმებელია ის გარემოება, რომ ამერიკის შეერთებულ შტატებში ფართო სპექტრია დაინტერესებული რეგიონში და კონკრეტულად, საქართველოში არსებული კონფლიქტების მოგვარებით. ეს მეტყველებს იმაზე, რომ ეს საკითხი ვიწროპარტიულ საკითხს არ წარმოადგენს და რომ აშშ-ის ხელისუფლება სრული მოცულობითაა დაინტერესებული ჩვენი კონფლიქტების მოგვარებით, რადგან ის საქართველოს განიხილავს როგორც ერთგულ მოკავშირეს, მთლიანად რეგიონში მიმდინარე პროცესებს კი, გლობალური უსაფრთხოების ერთ-ერთ მნიშვნელოვან საკითხად", - განუცხადა კალანდაძემ "ჯი-ეიჩ-ენს".
მისივე განმარტებით, ამერიკის შეერებული შტატების აქტიურად ჩართვას აღნიშნული საკითხის მოგვარებაში ისიც ადასტურებს, რომ მას ინტენსიურად აქვს დიალოგი უშუალოდ იმ სახელმწიფოსთან, რომლისგანაც საქართველოს მიმართ "საფრთხე მოემართება".
"თავის მხრივ, ჩვენც მჭდიროდ ვთანამშრომლობთ აშშ-სთან. ხდება ინფორმაციის გაცვლა. მიუხედავად ამისა, ძალიან მნიშვნელოვანია, რომ ობამას ადმინისტრაცია იღებდეს ინფორმაციას არა მხოლოდ საქართველოდან და რეგიონიდან, არამედ სწორედ ამერიკელი ექსპერტთა ჯგუფები აკეთებდნენ შესაბამის ანალიზს და მუშაოდბენ გეგმებზე. თუ ეს კიდევ დამატებითი ქვა იქნება იმ აღმშენებლობაში, რომელსაც ამერიკის შეერთებული შტატების პოლიტიკა ჰქვია რეგიონში უსაფრთხოებისა და საქართველოში კონფლიქტების მშვიდობიანად მოგვარების მიმართ, ამას მივესალმებით", - განმარტა კალანდაძემ.
შეგახსენებთ, რომ ამერიკის კონგრესის ცენტრის ექსპერტებმა საქართველოს კონფლიქტების მოგვარების გეგმა შეიმუშავეს, რომელშიც ისინი თეთრი სახლის ადმინისტრაციას პროცესში უფრო გააქტიურებისკენ მოუწოდებენ და გარკვეულ რეკომენდაციასაც აძლევენ.
