მან [გიორგი გახარიამ] ძალიან ბევრი ტყუილი თქვა, როდესაც ორჯერ გამოვკითხეთ. იმ შეხვედრებთან დაკავშირებითაც კი თქვა მან ტყუილი, სადაც მე ვესწრებოდი და ვიცი, რომ ეს ისე კი არა, სხვანაირად იყო და ეს რა თქმა უნდა, ადამიანურად ძალიან მტკივნეულია, [რადგან] ჩვენ მას ვენდობოდით, - განაცხადა გადაცემაში „იმედი LIVE“ პარლამენტის თავმჯდომარის მოადგილე თეა წულუკიანმა 20 ივნისის მოვლენებზე საუბრისას.

„20 ივნისის მოვლენების შემდეგ არაერთი შეხვედრა იყო და ძალიან მკვახე და მძიმე შენიშვნები და კითხვებიც დავუსვით მას. აქვე უნდა აღვნიშნო, რომ ისეთი მსხვერპლები როგორც არის მაგალითად მაკო გომური და სხვები, ვერასდროს მათ ვერ მოვთხოვთ რომ რაღაცა ტიპის გაგება ჰქონდეთ რაიმე ტიპის პროცესებისადმი; ხანდახან უსამართლობაც რომ გაეპაროთ თავიანთ განცხადებებში (არის ხოლმე ასეთი) მაინც მართლები არიან, იმიტომ რომ ახალგაზრდა ადამიანი როდესაც თვალის ჩინს დაკარგავს, ან სხეულის სხვა მძიმე დაზიანებას მიიღებს ხელისუფლების ბრალით, რა თქმა უნდა ჩვენ არ ვართ წინა ხელისუფლება, რომ ისევ დაზარალებული იყოს მტყუანი. ტრაგედიაა, რომ ამდენ ხანს გაგრძელდა ეს გამოძიება და კითხვა მაქვს, როგორ მოხდა ეს, იმიტომ რომ პრემიერ-მინისტრი იყო ის, ვინც თურმე პასუხისმგებელი ყოფილა და ხომ არ რომ გადადგა მან რაღაცა ნაბიჯები, რომ ეს ამდენ ხანს გაგრძელებულიყო? - არ ვიცი, კითხვას ვსვამ, მაგრამ სხვის კომპეტენციაში ვერ შევიჭრები. მთავარი არის ის, რომ სტრასბურგის ინდივიდუალური ღონისძიებები სრულდება, პროკურატურამ ძალიან ბევრი საგამოძიებო მოქმედება ჩაატარა, მათ შორის რუსთაველის გამზირზე. პროცედურა გაგრძელდება და დიდი იმედი მაქვს, რომ დიდ პალატაში სადაც არის გასაჩივრებული ეს გადაწყვეტილება, საქართველო მიიღებს უფრო სამართლიან ვერდიქტს, ვიდრე ეს იყო აქამდე. სამართლიანს იმ გაგებით, რომ ის რაც ამასობაში გაკეთდა, ჩაეთვლება ჩვენს სახელმწიფოს“, - განაცხადა წულუკიანმა.